Le Union Mundial pro Interlingua (UMI) invita omnes a prender un examine de interlingua e obtener certificato.

UMIUMI  Omnes, qui se occupa con interlingua, pote ora prender un examine official del lingua.

Usque le fin del anno 2011, on pote prender le examine sur un de duo nivellos secundo le normas lingual del Union Europee - A2 pro comenciantes e B1 pro avantiates. Isto es le nivellos que le participantes del 19ne Conferentia International de Interlingua prendeva in julio 2011.

Le examine consiste de septe-novem paginas con questiones e exercitios de vocabulos, de formar phrases e – pro le avantiates – un test del cognoscentia del litteratura in interlingua.

On pote prender le examine in casa, o on pote assister, quando le proxime examine habera loco durante le veniente incontro nordic de interlingua in julio 2012, probabilemente in Svedia.

Assi on se inscribe pro le examine:

  • 1. Annuncia te per e-posta a presidente@interlingua.com
  • 2. Nota, si tu desira participar in nivello A2 o B1.
  • 3. Scribe tu nomine, adresse postal e e-posta in le message.
  • 4. Paga 50 euros pro participar al conto del Union Mundial pro Interlingua (UMI): numero IBAN: FI18 1820 3000 0163 29 - numero SWIFT: NDEAFIHH

Si tosto que tu te ha inscribite e pagate le summa de participation, tu recipe le materiales pro le examine. De iste momento, tu ha un septimana pro completar lo e retornar tu responsas al UMI pro correction e approbation. Participantes recipe information via e-posta, si illes ha passate le examine o non, e in januario le certificatos official essera inviate a omnes, qui ha passate le examine.

Le examine in nivello B1 consiste in ultra de un parte oral. Iste test es arrangiate per le programma gratuite de telephonar per Internet, Skype. Plus de informationes super isto va esser inviate directemente a illes, qui se inscribe pro le examine B1.

"Le examines es un motivation pro le participantes a occupar se de plus in plus con interlingua pro sempre attinger le proxime nivello," dice Sven Frank, presidente del UMI.


PHOTOS: Le concentration esseva grande, quando le participantes del 19ne Conferentia International de Interlingua in Bulgaria in julio prendeva lor examines. Photos: Thomas Breinstrup
 

Lege anque:
Prime reportos del conferentia in le montes bulgare