Petyo Angelov ha morite
Le grandissime interlinguista, justo reeligite como secretario general del UMI, decedeva de un infarcto cardiac e habeva solmente 33 annos.
Totalmente inexpectate e solmente 22 dies post que ille esseva eligite nove secretario general del Union Mundial pro Interlingua, Petyo Angelov ha morite de un infarcto cardiac, solmente 33 annos de etate.
Petyo Angelov moriva in le matino le 6 de maio e esseva ja le 7 de maio interrate in le cemeterio del village Tuchenitsa, Pleven in Bulgaria. A tote le mundo de interlingua manca parolas del perdita de iste multitalento lingual e musical.
Ante solmente alcun menses Petyo Angelov se poneva a disposition pro retornar a su empleo como secretario general del UMI, un posto que ille habeva ab 2006 al 1 de septembre 2008, quando ille se retirava a causa de labor in un organisation cuje scopo non poteva corresponder con le neutralitate del UMI. Le Consilio General del UMI le reeligeva al posto unanimemente ab le 15 de april 2012.
Le perdita de Petyo Angelov es enorme pro interlingua e tote le personas, qui supporta le labor pro diffunder e usar le lingua. Nos ha perdite un genio linguistic e un prominente in le movimento pro interlingua. Su nivello de energia e activitates esseva enorme, e ille habeva grande planos pro le futuro - pro se mesme e pro interlingua. Su visiones sempre non se limitava a lo que immediatemente esseva possibile; ille cercava ir un poco plus in avante. Isto, a vices, poteva devenir abstracte pro su ascoltatores.
Ma Petyo Angelov esseva humoristic, persuasive e extrememente competente in su dominios de interesse. Ille aperiva portas que non semblava aperibile, e ille laborava como un cavallo - no, duo - pro complir le promissas que ille habeva date. Ille assi esseva le motor del action que in le ultime momento salvava le conferentia international de interlingua in 2011 per organisar lo rapidemente in Chepelare in Bulgaria, quando le alternativa primari falleva. Omnes, qui assisteva a iste conferentia lo memora con enthusiasmo.
Petyo, qui nasceva le 7 de novembre 1978, se occupava con interlingua desde 1997, quando ille charmava le participantes del conferentia international de interlingua in Strasbourg, Francia. Desde alora ille esseva active pro interlingua e assi, naturalmente, anque le representante del UMI in Bulgaria.
Su activitates principal de labor esseva le maneamento de su schola de linguas, Sigilla, e le traduction de libros pro editores bulgare. Petyo Angelov studiava in le Lyceo National Classic in Sofia e continuava su studios in le Universitate de Sofia (philologia classic, BA) e in le Nove Universitate Bulgare (egyptologia, MA). Su curriculo professional includeva anque postos como professor in le Lyceo Classic, le Universitate de Sofia e in plure altere scholas de linguas in Bulgaria. Ille preparava su doctorato in historia del mathematica e sperava poter vantar se de su PhD ante le conferentia sequente de interlingua. Ille cognosceva e parlava multissime linguas.
Ille anque esseva un talento musical lo que ille demonstrava durante multe conferentias. In Chepelare in 2011, ille cantava - con Milen Shopov - duettos con ancian cantos classic de Bulgaria in un ecclesia ancian que le conferentia visitava. Omnes esseva toccate per le intensivitate de lor cantar.
Le morte de Petyo Angelov es un grande choc e dolor pro nos omnes. Nostre calide pensatas sincer va a su amor Stefka, qui le supportava in tote su cargas e que nos cognosce desde multe annos, su familia e tote le amicos bulgare e international qui ha perdite un amor e amico tanto remarcabile.
Que su memoria sia honorate!
Sven Frank, presidente
Martijn Dekker, vice-secretario
Alberto Mardegan, administrator
Thomas Breinstrup, redactor del Panorama