Duo veteranos de interlingua entra in le direction del Union Mundial pro Interlingua.

UMIPresidente e vice-tresorero  Le organisation global pro promover interlingua, le Union Mundial pro Interlingua (UMI), ha eligite su nove presidente. Il es le prime vice desde le fundation in 1955 que un francese occupa le posto e solmente le secunde vice que le presidente es un femina.

Alix Mahé-Potet, qui es doctor de informatica in le dominio de intelligentia artificial e nunc pensionate, esseva unanimemente eligite pro le posto per le Consilio General del organisation mundial, que ha membros e representantes sur cinque continentes. Illa assume le posto le 14 de novembre 2015 e seque assi Sven Frank, Germania, qui esseva presidente usque le 31 de decembre 2014. Desde alora le posto va essite vacante, durante que le UMI ha laborate pro trovar un successor. Alix Mahé-Potet ha durante le recente cinque annos assistite le Consilio Executive, que prende cura del labor quotidian del Union Mundial pro Interlingua, con multe cargas.

Le nove presidente, qui ha 69 annos, es de un familia de interlinguistas. Su soror es hodie le secretaria del Union Interlinguista de Francia (UIF), del qual Alix Mahé-Potet es le vice-presidente. Lor patre, Jean Mahé, esseva inter le fundatores del UIF, e le familia ha participate in le labor de interlingua durante decennios. Le familia anque esseva le arrangiatores in chef del 8ve conferentia international de interlingua in Paris in 1987 e del 13tie conferentia international de interlingua in Strasbourg in 1997.

Unanimemente esseva anque eligite Michel Prim, equalmente Francia, como nove vice-tresorero del UMI. Desde 2002, Michel Prim es le tresorero del UIF e ha durante un periodo assistite le tresorero e administrator del UMI, Alberto Mardegan. Anque Michel Prim, 62 annos e pensionate chef de atelier in le Travalios Public (TP), ha essite un diligente participante in le conferentias international e le incontros nordic de interlingua.

Post le election le Consilio Executive consiste de:

• presidente: Alix Mahé-Potet (Francia)
• secretario general: Julian Mendez (Germania)
• vice-secretario: Martijn Dekker (Nederland)
• tresorero/administrator: Alberto Mardegan (Finlandia)
• vice-tresorero: Michel Prim (Francia)
• redactor de Panorama: Thomas Breinstrup (Danmark)

Le UMI esseva establite in julio 1955, quatro annos post le apparition de interlingua. Le UMI es juridicamente registrate presso le autoritates francese.

Le photos del nove presidente e vice-tresorero es ab le duo presentationes de interlingua in francese que illes ha facite pro le sito official, www.interlingua.com.

Le Union Mundial pro Interlingua (UMI), establite le 28 de julio 1955 pro diffunder le international lingua auxiliar interlingua, es un institution pro cooperation international con membros e representantes in cinque continentes. Le UMI esseva registrate juridicamente como association numero W911001865 per le autoritates francese le 3 de augusto 2006. Le Consilio Executive es responsabile pro le functiones quotidian del UMI. Le Consilio General fixa le strategia e labor al longe lineas. Le UMI publica desde januario 1988 le international magazin de novas Panorama in interlingua (ISSN 0903-2932) omne duo menses. Interlingua esseva publicate in 1951 per le International Auxiliary Language Association (IALA).