Bent Andersen ha morite
Un grande rocca de interlingua non sta plus.
Bent Andersen, un del major pioneros de interlingua e un fortia major in le Union Mundial pro Interlingua (UMI) e le Union Danese pro Interlingua (DIU) durante decennios, ha subito morite le 20 de martio, 86 annos de etate.
Bent Andersen esseva quasi synonymo con interlingua con le qual ille se ha occupate desde poc tempore post le apparition del lingua in 1951. Ille esseva desde le establimento del UMI un del duo representantes danese - un posto que ille ancora manteneva - e esseva inter le initiatores del reorganisation del organisation mundial in 1970. Inter 1970 e 1989 ille esseva le vice-secretario del UMI, e parallelmente - inter 1970 e 1994 - ille esseva le tresorero-administrator del organisation.
Sempre occupate de qualitate e si proxime a un resultato perfecte como possibile Bent Andersen ha durante decennios participate in plus o minus omne publicationes in interlingua in tote le mundo, un labor que ille essayava diminuer durante le recente annos, ma totevia ille continuava leger probas al magazin international de novas Panorama in interlingua e le magazin nordic de interlingua Actualitates. Ille finiva le correction de ambe magazines ante un septimana. Solmente un septimana retro ille anque finiva leger probas al classico "Le parve prince" que ille non cognosceva in avantia, e ille esseva si enthusiasmate que ille offereva leger un secunde proba - e naturalmente ille trovava ancora quatro-cinque detalios a corriger.
Bent Andersen esseva co-fundator del Union Danese pro Interlingua le 7 de novembre 1960. Ille deveniva le secretario/tresorero combinate usque martio 1963, quando ille continuava como tresorero solmente - un posto que ille ha occupate usque februario 1994, quando ille deveniva vice-presidente del DIU. Ante alcun annos ille desirava retirar se un poco pro remaner sin cargas quotidian e administrative e in vice occupar se con su sanitate e guardar le casa e jardin in su urbe Odense e su familia, e le 10 de maio 2013 ille esseva eligite consiliero ordinari.
In bon humor, Bent Andersen celebrava su 86te anniversario jovedi le 17 de martio con su familia. Sabbato le 19 ille subito se sentiva mal e esseva hospitalisate. Le proxime matino, a 6 horas, ille moriva de un attacco cardiac.
Le signification de Bent Andersen pro interlingua es difficile a subestimar. Su talento pro organisar e administrar, su adjuta practic e su bon consilios lingual ha essite invalutabile e grandemente appreciate, mesmo si ille modestemente sempre ha preferite non esser mentionate troppo.
Bent Andersen esseva un persona multo agradabile e sympathic, con grande humor (e grande appetito de gelatos!), ingagiate, dedicate e un cavallo de labor. Ille esseva - como un amico le describe - "un grande rocca" in le mundo de interlingua, e - como explica un altere amico - "nulle altere homine in le mundo ha facite tanto como Bent Andersen pro le diffusion e le alte standard de qualitate como Bent Andersen".
Que le memoria de Bent Andersen vive pro sempre!
In le nomine del Consilio Executive del Union Mundial pro Interlingua
Thomas Breinstrup
redactor del Panorama in interlingua