Le Union Tchec pro Interlingua ha essite appunctate per le Union Mundial pro Interlingua.

UMI  Le Union Tchec pro Interlingua representa ora interlingua in le Republica Tchec.

Le 13 de septembre moriva le representante de interlingua in le Republica Tchec desde multe annos, Karel Podrazil, solmente 69 annos de etate. Le Union Mundial pro Interlingua ha como successor appunctate le Union Tchec pro Interlingua que debe promover interlingua in le pais e crear interesse pro apprender e usar lo.

Le Union Tchec pro Interlingua ha como presidente Bohdan Šmilauer e gere le sito www.interlingva.cz (le -u- in le nomine "interlingua" es difficile a pronunciar pro tchecos). Bohdan Šmilauer ha, con Oldrich Mechura e Eva Hajkova, (re)presentate interlingua in duo grande expositiones public in Praga durante 2017, e illes ha elaborate le version tchec del famose manual per Ingvar Stenström, "Interlingua - instrumento moderne de communication international", que esseva publicate in februario 2017. Le gruppo es actualmente in le processo de elaborar nove dictionarios interlingua-tchec/tchec-interlingua.

Le Union Mundial pro Interlingua previde un collaboration fructuose e bon con le Union Tchec pro Interlingua como nove representante de interlingua in le Republica Tchec que ha un longe historia de interlingua.