Le presidente del Union Mundial pro Interlingua 1993-1999 e recognoscite economo habeva 93 annos.

UMILeland B. Yeager  Leland B. Yeager, le presidente del Union Mundial pro Interlingua inter 1993 e 1999 e un supportator fidel del lingua desde su initio in 1951, moriva in le vespere del 23 de april, 93 annos de etate.

Ille contribueva enormemente pro demonstrar que interlingua es professional, e ille sempre laborava seriosemente con e pro interlingua. Leland B. Yeager (B pro Bennett) esseva un persona unic – e un grande nomine in circulos de economos como experto de politica monetari e commercio international. Ille ha publicate numerose articulos e libros, felicemente anque multes in e super interlingua, e ille ha presentate excellente discursos interessante durante plure conferentias international de interlingua.

Respectate e cortese. Le gentleman correcte. Quiete – un poco reservate e formal – e intelligente. E sempre con alte standards. Leland B. Yeager esseva un persona extraordinari e remarcabile in su labor professional e un dono pro interlingua con su professionalismo e su interesse profunde e seriose pro le lingua, e nos omnes es multissimo grate pro su effortios.

Panorama in interlingua, le magazin international publicate per le Union Mundial pro Interlingua (UMI), publica in su edition de martio-april un necrologia plus extense super Leland B. Yeager.

Que vive su memoria!

Le Consilio Executive del Union Mundial pro Interlingua