Madeleine Mahé es le nove presidente del Union Mundial pro Interlingua ab le 1 de januario 2019.

UMIMadeleine Mahé  Le organisation global pro promover interlingua, le Union Mundial pro Interlingua (UMI), ha ab le 1 de januario 2019 un nove presidente – le soror minor del presidente desde 2015.

Madeleine "Mado" Mahé succede su soror, Alix Mahé-Potet, qui desde le 14 de novembre 2015 ha presidite le UMI. Le sorores es de un familia de interlinguistas – lor patre essente Jean Mahé (1916-2001) – e ha assi essite involvite in le labor de interlingua durante multe decennios.

Madeleine Mahé, 71 annos, es educate professor de musica, ama organisar e arrangiar, ama viagiar e ama cattos. Illa esseva unanimemente eligite pro le posto per le Consilio General del organisation mundial, que ha membros e representantes in cinque continentes. Illa ha sovente date un mano al UMI pro solver cosas practic e administrative.

Madeleine Mahé vive con Michel Prim, qui es le vice-tresorero del UMI e anque un veterano conferential como le duo sorores, qui con lor familia ha participate in numerose conferentias international de interlingua e incontros nordic de interlingua. Illas es cognoscite como sempre energic, sempre positive e sempre in bon humor, e illas ha plure vices essite le professores del cursos de interlingua del conferentias. Le familia esseva le arrangiatores in chef del 8ve conferentia international de interlingua in Paris in 1987 e del 13tie conferentia international de interlingua in Strasbourg in 1997.

Alix Mahé-Potet, pensionate doctor de informatica in le dominio de intelligentia artificial, desirava retirar se del posto que illa originalmente acceptava como temporari pro supportar le UMI, quando Sven Frank quitava le presidentia in le fin de 2014. Illa ha facite un grande labor pro le UMI, e le Consilio Executive del UMI, que prende cura del cargas quotidian in le organisation, es extrememente grate pro su ingagiamento positive e collaboration active durante specialmente le passate tres annos.

Madeleine Mahé es anque le secretaria del Union Interlinguista de Francia (UIF).

Post le election le Consilio Executive consiste de:

• presidente: Madeleine Mahé (Francia)
• secretario general: Julian Mendez (Germania)
• vice-secretario: Martijn Dekker (Nederland)
• tresorero/administrator: Alberto Mardegan (Finlandia)
• vice-tresorero: Michel Prim (Francia)
• redactor de Panorama: Thomas Breinstrup(Danmark)

Le UMI esseva establite in julio 1955, quatro annos post le apparition de interlingua. Le UMI es juridicamente registrate presso le autoritates francese.

Le Union Mundial pro Interlingua (UMI), establite le 28 de julio 1955 pro diffunder le international lingua auxiliar interlingua, es un institution pro cooperation international con membros e representantes in cinque continentes. Le UMI esseva registrate juridicamente como association numero W911001865 per le autoritates francese le 3 de augusto 2006. Le Consilio Executive es responsabile pro le functiones quotidian del UMI. Le Consilio General fixa le strategia e labor al longe lineas. Le UMI publica desde januario 1988 le international magazin de novas Panorama in interlingua (ISSN 0903-2932) omne duo menses. Interlingua esseva publicate in 1951 per le International Auxiliary Language Association (IALA).