Le Union Mundial pro Interlingua invita tote le mundo a producer breve videos in interlingua pro motivar le spectatores a apprender interlingua. Il habera premios attractive.

UMIIncontro digital in interlingua  Le Union Mundial pro Interlingua (UMI) invita a un grande concurso de videos sub le titulo “Io ama interlingua” con bon premios pro le films le plus attractive e inspirante.

Omnes, qui habeva al minus 18 annos le 1 de januario 2021, es invitate a participar in le concurso “Io ama interlingua”. On debe producer un breve video de al maximo duo minutas in interlingua correcte. Illo debe esser attractive e inspirante e presentar le utilitate e possibilitates de apprender e usar interlingua. Le films debe adjutar interlingua a esser diffundite a sempre plus de interessatos e usatores active.

“Nos gaude multo a vider le creativitate de omnes, qui participa in le concurso. Io es secur que isto va confirmar, proque nos omnes ama interlingua,” dice Madeleine Mahé, le presidente del UMI, qui desira bon successo a omnes.

Le film debe:

  • esser un video que motiva apprender e parlar interlingua.
  • durar al maximo 2 minutas.
  • esser parlate in interlingua correcte.
  • haber subtitulos in interlingua de tote le parolas parlate (in un file separate) e le possibilitate de haber subtitulos separate in altere linguas.
  • esser apte pro un audientia general de tote le etates.
  • le participante debe dar al UMI le permission de publication del video.

Le data limite de livrar le video finite es le 15 de julio 2021.

Le premios pro le optime films in le concurso “Io ama interlingua” es:

  • prime premio: 500 EUR
  • secunde premio: 300 EUR
  • cata mention honorific: 100 EUR

Un international gruppo de judices competente va judicar le videos e seliger le ganiatores del competition. Le judices es Paolo Castellina (Grande Britannia), Inger Olsson (Svedia), Daniel Weingärtner (Germania), Jacinto Javier Bowks (SUA), Carmelo Serraino (Italia) e Bohdan Šmilauer (Tchechia).

Lege le regulas pro participar in le concurso “Io ama interlingua” in basso (o discarga los ci). | Studia le Guida de crear subtitulos pro un film (il ha multe altere methodos)

Concurso “Io ama interlingua” 2021

Le Union Mundial pro Interlingua (UMI) te invita a participar in le Concurso “Io ama interlingua” 2021. Le scopo del concurso es producer un breve video attractive e inspirante que presenta le utilitate e possibilitates de apprender e usar interlingua pro assi diffunder le lingua a plus de interessatos e usatores.

Le regulas pro participar in le concurso es assi:

Proprietates del video

1. Illo debe esser un video que motiva apprender e parlar interlingua.
2. Illo debe durar al maximo 2 minutas.
3. Illo debe esser parlate in interlingua correcte.
4. Illo debe haber un archivo associate con le subtitulos de tote le parolas parlate in interlingua.
5. Il pote haber plure archivos con subtitulos traducite a altere linguas pro meliorar le comprensibilitate del video.
6. Illo debe esser apte pro un audientia general (G) de tote le etates.
7. Le participante debe dar al UMI le permission de publication del video.

Proprietates del participante

8. Le participante non pote esser un membro del consilio executive o general del UMI, non pote esser un judice, e non pote esser un familiar directe de un membro del consilio executive o general del UMI o un judice.
9. Le participante debe haber al minus 18 annos al 2021-01-01.

Proprietates del judices

10. Le judice non pote esser un membro del consilio executive del UMI, o un familiar directe de un membro del consilio executive UMI.
11. Le judice debe haber al minus 18 annos al 2021-01-01.

Procedura

Le concurso ha le sequente phases:

Phase 1: Invio de videos

• Cata participante pote inviar un o duo videos secundo le conditiones listate in le “Proprietates del video”.
• Le data limite de inviar le contributiones es le 15 de julio 2021.
• Le UMI suggere al participantes non lassar le invio del video pro le ultime dies, pro evitar esser eliminate del competition.
• Le video debe esser cargate a un sito internet (per exemplo, YouTube, Vimeo, Rutube, etc., o al sito personal del participante), e on debe inviar un message de e-posta electronic a concurso2021@interlingua.com con instructiones super como acceder le video. Si on vole evitar de favorir le altere concurrentes, on pote occultar le video al cerca, e lassar lo accessibile solmente a qui cognosce le ligamine directe.

Phase 2: Evalutation del videos

• Cata judice debe reguardar tote le videos inviate e dar un evalutation a cata video.
• Le votos possibile es:

    ◦ 5 – prime position
    ◦ 3 – secunde position
    ◦ 1 – mention honorific
    ◦ 0 – sin punctos
• Cata judice pote dar al maximo un prime position, un secunde position, e tres mentiones honorific.
• Le judices debe dar ille punctos in forma independentemente, sin consultar con le altere judices, e reportar los al UMI.

Phase 3: Definition del ganiatores

• Quando le punctos del videos ha essite colligite, le judices debe accordar un ordine unic de ganiatores de 5 positiones:
    ◦ un prime position
    ◦ un secunde position
    ◦ tres mentiones honorific
• Cata participante pote reciper al maximo un premio.
• Si le judices non pote attinger un accordo, le UMI facera le ordine del ganiatores basate unicamente in le videos que recipeva punctos del judices.

Phase 4: Publication del video

• Cata ganiator del concurso pote ceder le derectos a UMI o liberar le video con un licentia CC-BY-SA 4.0 o minus restrictive (como dominio public).
• Le ganiatores del concurso recipira le sequente premios:
    ◦ prime premio: 500 EUR
    ◦ secunde premio: 300 EUR
    ◦ cata mention honorific: 100 EUR
• Le videos ganiator essera publicate in le sito de UMI.

Phase 5: Retrospectiva

• Como in omne competition, il pote haber errores in le processo o in le judicamento del videos.
• In tal caso, UMI colligera le opinion del participantes e del judices.

Martio 2021