Historia de Interlingua: Panorama - le schizzo confidential

Panorama - le schizzo confidential

Le schizzo confidential que duceva al fusion del Currero e del Heraldo de Interlingua e presentava al mundo in januario 1988 le nove magazin official del UMI, Panorama in interlingua.

Per Thomas Breinstrup

"Panorama - information international per interlingua" esseva le titulo de labor, quando le suprasignate le 9 de junio presentava al consilio del Union Mundial pro Interlingua le schizzo "a un nove periodico de interlingua, essente un combination del "Currero" e "Heraldo" e essente le magazin official del UMI."

Le nomine esseva seligite post multe pensatas - "es un vocabulo international que dice qualcosa super le contento: un speculo de un cultura (inter)national sur un plano global. Illo anque es facile a pronunciar - omnes dice panorama," como se scribeva in le tres paginas que deveniva le fundamento del nove magazin fusionate, cuje prime edition appareva in januario-februario 1988.

In Heraldo de Interlingua, septembre-octobre 1987 (un edition totalmente dedicate al 8-ve Conferentia International de Interlingua in Paris, ubi le decision esseva prendite), on presentava le nova assi:

"Le fin del Heraldo e Currero -
benvenite a nove magazin grande

Al fin de iste anno le ultime numero del "Heraldo de Interlingua" e del "Currero" apparera. Le duo magazines essera fusionate a un nove e plus grande magazin commun.

Isto esseva decidite durante le conferentia per le participantes. Durante annos on ha discutite como unir le fortias de diffunder interlingua in un magazin in loco de in plure periodicos. Al conferentia esseva acceptate un proposition per le redactor del "Heraldo", Thomas Breinstrup, que significa que on pote dar le benvenita a un toto nove magazin ab januario 1988. Le titulo essera international, "Panorama".

Panorama va devenir le magazin official del Union Mundial pro Interlingua. Illo va apparer sex vices cata anno, cata numero con 28 paginas plen de lectura in interlingua. Redactor in chef del nove revista essera Thomas Breinstrup, qui es educate jornalista de profession.

Le nove Panorama essera un periodico toto differente ab le presente revistas de interlingua. Illo va esser pro tote le familia ma con un contento variante ab articulos general de themas actual, novas de interlingua, recensiones de libros de interesse international, parve notas curiose super le mundo actual, paginas con litteratura in interlingua, intertenimento e multe altere cosas. Panorama non solmente essera pro le interlinguistas ma pote certo anque interessar le population in p.ex. Italia, Espania e Portugal como in partes de America Latin e Sud e Africa ubi on sin problemas - e sin cognoscer interlingua - pote leger e comprender le lingua.

Le impression e expedition del nove magazin essera facite per le Servicio de LIbros in Nederland, durante que le administration del UMI in Odense, Danmark, continuemente collige le abonamentos.

Con Panorama on ha create un toto nove magazin attractive que e dara plus de informationes, lectura e gaudio al interlinguistas e pote esser usate in le information pro diffunder le lingua ancora plus. Le precio de un abonamento es multo basse, comparate a illo hodie de Currero e Heraldo. Solmente 50 coronas danese o 15 florinos nederlandese.

Le UMI spera que omne interlinguistas e interessatos de interlingua va dar le benvenita al nove revista cuje prime numero apparera in januario-februario. Le redaction ja prepara le prime edition, durante que on trova le collaboratores al redaction.

Ante le prime numero del Panorama va apparer ancora duo numeros del Heraldo e le ultime numero del Currero no. 90, in octobre-decembre. Post le dimission de K. Wilgenhof como redactor de Currero, dr. Ferenc Jeszenszky (Hungaria) per le conferentia esseva eligite redactor interimari del ultime numero.

Certo le Panorama non deveni un "Spiegel" o "Time Magazine", ma illo va contribuer a esser un Speculo al Tempore in forma de un Magazin plen de interessante articulos e lectura agradabile in interlingua. Th."

FACTOS

Ab le protocollo official del 8-ve Conferentia International de Interlingua (le 26 de julio al 2 de augusto 1987 al École Centrale in Antony, Paris), lunedi le 27 de julio:

"Le proxime thema: magazines
Le conferentia votava in favor de un fusion de "Currero" e "Heraldo de Interlingua" post que Thomas Breinstrup presentava un nove projecto que finalmente obteneva le nomine "Panorama" con le subtitulo "in interlingua". Esseva decidite que Thomas Breinstrup deveni le redactor in chef, e que le nove magazin apparera sex vices cata anno, cata numero con 24 pp. A5, con comenciamento in januario 1988. Le problemas practic de impression (per le Servicio de Libros) e composition professional del texto esseva analysate, e le administration del UMI ha obtenite mandato a investigar le possibilitates con le scopo que UMI eventualmente compra un impressor de laser pro su nove magazin official.

Ingvar Stenström sublineava que un tal magazin non se limita a interlinguistas ma anque es vendibile in Espania, Portugal e Italia. Pro isto annuncios in le jornales national pro "Panorama" esserea apte pro trovar un publico plus large.

Post le dimission de K. Wilgenhof como redactor del "Currero" esseva eligite Ferenc Jeszenszky como redactor interimari del ultime numero, no. 90, que debe apparer octobre-decembre."

Le session finiva a 17.30 horas.