Le Heraldo rebelle voleva
novas de interlingua

Plus de novas super le labor pro interlingua in le columnas. Isto esseva le ration proque un interlinguista de 16 annos establiva su proprie magazin in interlingua. Septe annos plus tarde illo fusionava con le organo official.

Novas. Plus de novas. Plus novas de interlingua

Isto esseva le recepta detra le magazin private, Heraldo de Interlingua, que le juvene danese Thomas Breinstrup de alora 16 annos comenciava editar in 1981. Septe annos e 38 editiones plus tarde illo fusionava con le organo official del Union Mundial pro Interlingua, Currero, pro devenir le bimensual Panorama.

Currero esseva le organo official, professionalmente imprimite con un linguage sempre a 100 pro cento correcte - ma sin grande peso a lo que le nove interlinguista danese voleva leger: le novas de interlingua e plus sovente que le tres menses que iva inter cata edition del Currero. Nam que occurreva in le grande mundo pro informar super interlingua? Le Currero solmente publicava parve notitias super isto - e illos non esseva multes.

Dunque si le novas non veniva al Currero, alora on mesme debeva trovar los. E assi comenciava le parve "magazin rebelle", facite per machina a scriber e photocopiator. Non pro furar lectores ab le Currero - que generosemente mentionava su apparentia - ma como un sorta de supplemento de novas, specialmente del novas de interlingua.

"Ab le initio in augusto-septembre 1981 le Heraldo ha habite un altere contento plus popular e actual que le Currero. Isto forsan esseva le causa que le magazin rapidemente deveniva popular e habeva multe abonatos. Le prime numero appareva in solmente 15-20 exemplares e esseva de 10 paginas. Desde alora un numero sempre esseva de 12 paginas," scribeva le redactor Thomas Breinstrup in le ultime edition que appareva in novembre-decembre 1987.

A ille tempore, Heraldo de Interlingua habeva abonatos in plus que 20 paises in omne partes del mundo.

Interlingua in le centro - e le columnas

Le novas de interlingua, le recensiones de libros in interlingua, le notas de personas qui laborava pro interlingua, le interviews con un serie del representantes de interlingua etc. debeva demonstrar faciettas del grande labor que esseva facite in tote le mundo pro diffunder interlingua e informar super le lingua. Tote editiones esseva dedicate al 5-nte Conferentia International de Interlingua in 1985 e al 6-te Conferentia International de Interlingua in 1987, un linea que continua in Panorama.

Durante un periodo, un Foro linguistic anque appareva, ma como es sempre le caso, le debattentes submergeva in detalios lingual que esseva absolutemente sin interesse pro le majoritate del lectores.

"Io ha le grande gaudio que Heraldo vermente ha facite le movimento de interlingua plus active. [...] Heraldo deveniva un modo de presentar interlingua activemente a nove interessatos. Un participante al conferentia de interlingua in Sheffield [in 1985, red.], Alice Sturges [le filia de Alice V. Morris, le cerebro detra interlingua], me narrava que Heraldo esseva le causa que illa con su marito esseva presente. Un tal commentario caleface! Anque, Heraldo ha essite usate in le inseniamento de nove interlinguistas in p.ex. Polonia e Romania," Thomas Breinstrup scribeva in su ultime editorial in 1987.

1 + 1 = 1

Durante plure annos, multes desirava que le fortias del Heraldo de Interlingua esseva unite con illos del Currero, assi facente un grande magazin in interlingua in loco de duo plus parves. Le natura del duo magazines totevia non lo permitteva usque in 1987. Le redactor durante 21 annos, le danese H.P. Frodelund, se retirava, e Karel Wilgenhof deveniva nove redactor ab januario 1985. On comenciava considerar un nove futuro pro le magazin. Al 6-te Conferentia International de Interlingua in Paris, Francia, durante le estate 1987 le planos de un magazin fusionate esseva approbate, e in novembre-decembre le mesme anno appareva le ultime edition del Heraldo de Interlingua.

Su redactor, Thomas Breinstrup, deveniva redactor del nove magazin, Panorama in interlingua, que desde su prime edition in januario-februario 1988 continuava le linea del "rebello":

Novas. Plus de novas. Plus novas de interlingua.

Redaction: Th. Breinstrup, Ingvar Stenström e Jesper Olsson
Copyright © 2001-2007 Union Mundial pro Interlingua