50 annos in jubil(e)o
Communication sin frontieras durante 50 annos. Isto es un record in se - e le prova que
interlingua non es un idea bizarre ma un lingua vivente e natural. E, quasi
symbolicamente, le anno jubilari 2001 anque es le Anno Europee de Linguas, declarate per
le Consilio de Europa e le Union Europee. Ci on vole emphasar le valor del ricchessa de
linguas. Interlingua es per multes considerate "le lingua in le linguas", un
sorta de lingua pan-europee.
Le historia de interlingua es extraordinari in multe manieras. Il es historic que un
international organisation linguistic professional usa 27 annos pro studios scientific e
linguistic ante de presentar le nucleo del linguas vivente, "le lingua in le
linguas". E il es historic que interlingua durante le passate 27 annos ha continuate
fortificar su position global como le international lingua auxiliar.
Le historia de interlingua merita esser colligite. Isto es un enorme labor. Non
solmente proque illo coperi le periodo de un medie seculo, anque proque illo involve tote
le mundo. Nam, contrari a multe altere initiativas, le labor pro interlingua ha vermente
essite international desde su apparition in 1951.
Originalmente, le intention esseva publicar un libro con le historia de
interlingua - un libro jubilari que debeva apparer al die del 50-esime anniversario in
januario 1951. Ma on debe esser realistic: Ja durante le prime dies post un tal
publication, personas ab tote le mundo subito discoperi que illes anque ha materiales con
le qual(es) contribuer, e un tal libro pro isto essera incomplete ab initio.
In vice, le Union Mundial pro Interlingua ha decidite aperir iste sito special jubilari
in Internet. Ci es presentate pecias al grande puzzle que forma interlingua e su historia.
Le avantage de Internet es que on pote sempre revider dynamicamente le paginas, corriger
errores e adder informationes. Il es le spero del redaction que le visitatores va lassar
se inspirar e contribuer con nove materiales, litteras, documentos, libros, photos,
registrationes sur cassetta, sur video etc., assi que le historia de interlingua pote
devenir ancora plus complete e reflecter le enorme labor que ha essite facite globalmente
pro diffunder interlingua e le uso active del lingua. Nam sperabilemente anque le anno
jubilari in se va inspirar multes a percurrer lor archivos, assi que nove materiales
excitante pote apparer.
In le fin de 2001 o in le initio de 2002, on pote alora editar le libro con le
historia de interlingua.
Le redaction spera obtener multe reactiones e nove contributiones. Specialmente nos
amara haber narrationes personal e documentation in forma de originales e photos.
Iste sito, Interlingua 2001, debe developpar se durante tote le anno. Dunque visita
nos, lege e retorna sempre - anque con nove informationes que pote esser expedite per le
adresse de e-posta historia@interlingua.com.
Messages a iste adresse attingera omne le tres redactores.
Gratias pro tu adjuta - e bon placer con le aventuras historic de interlingua!
Jesper Olsson
Ingvar Stenström
Thomas Breinstrup
Reguarda anque le Presentation del redaction |
