|
 |
Erik Berggren
Svedia
Nascite: 22 de januario 1907 - 9 de octobre 1992
Desde 1964, Erik Berggren laborava pro interlingua post haber participate durante plus
que 60 annos in le labor pro linguas auxiliar, primo como usator de novial, pois de
occidental e finalmente, desde 1964, de interlingua.
Erik Berggren es co-autor del "Svensk-Occidental ordbok" (1947) e scribeva le
prime schizzo al manuscripto del "Interlingua-svensk ordbok", un grande projecto
del Societate Svedese pro Interlingua (SSI) que involveva plure autores. Le manuscripto
non esseva jammais publicate. Ille anque participava in le production de multe libros in
interlingua, i.a. "Svensk-Interlingua ordbok" per John
Nordin e le manual per Ingvar Stenström,
"INTERLINGUA - instrumento moderne de communication international". Ille esseva
un del traductores de "Populationes in developpamento" per Hannes Hyrenius e de
"Ante-Post" per Gösta Ehrensvärd. In ultra, ille ha publicate recercas lingual
"Reexaminationes e emendamentos de vocabulos interlingual" e "Vocabulos
supplementari" (1974).
Erik Berggren esseva 1965-1982 le secretario-tresorero del SSI, qui le faceva membro
honorari in 1988.
Ille se retirava como consiliero general del Union Mundial pro Interlingua (UMI) in le
fin de 1991 in le etate de 85 annos. |
|
|
