Jerzy Dembicki

Polonia
Nascite: 28 de maio 1931 - 24 de julio 2000

Le 24 de julio 1993 esseva le prime die del 11-e Conferentia International de Interlingua in Borne, Nederland. De bon hora in le matino arrivava, exhaurite post un longissime viage per autobus ab Polonia, Jerzy Dembicki de Nowy Sacz, le representante de UMI in su pais. Le prime incontro con iste amabile homine esseva tamben le ultime. Al mesme data septe annos plus tarde Jerzy Dembicki moriva lassante in lucto su sposa Irena, lor filia Dorota, qui desde 1981 habita in Svedia, e su multe amicos.

Ibi in Borne, post un jentaculo e alcun horas de reposo, Jerzy Dembicki participava con enthusiasmo e con obvie gaudio de esser presente. "Io me senti toto felice de esser hic – io ama le atmosphera!" ille diceva durante le vesperes quando le duo pianistas Peter Gopsill e Thomas Breinstrup interteneva e omnes cantava de plen cordes.

Ille apprendeva esperanto in 1956, esseva delegato del Universala Esperanto-Asocio e vice-presidente del filial local del Association Polonese de Esperanto. In le annos 60 ille se interessava e occupava de ido, occidental e Basic English. In 1992 ille comenciava apprender interlingua - e finalmente trovava su lingua favorite.

Jerzy Dembicki assumeva le carga de representante de interlingua pro Polonia in le primavera 1992 post le decesso in januario le mesme anno de Kazimierz Gebarski. Ille esseva un active collaborator del Panorama, assi arrangiante con plure jornales polonese un accordo de collaboration con Panorama. Ille anque mesme ha livrate multe articulos, contributiones belletristic etc. e ha scribite articulos pro le pressa local, ubi ille anque esseva interviewate.

In 1994 ille laborava multo pro sondar le possibilitates de un conferentia in su region del sud de Polonia. Ille condivideva mi idea, sovente repetite, de arrangiar un conferentia international de interlingua in Est-Europa, a fin de facer lo accessibile al multe interlinguistas est-europee. I.a. ille prendeva contactos con jornales e le station local de television. Regrettabilemente a ille tempore problemas cardiac se manifestava e ille debeva drasticamente restringer su activitates.

Ma ille sempre legeva - in plure linguas - e habeva questiones pro saper plus. Le campos de interesses de Jerzy Dembicki esseva multo vaste: litteratura mundial e polonese, eventos actual e historic – toto! "Nihil human a ille alien."

Post finir le schola primari ille frequentava le lyceo, ubi ille passava le examines final con laude. In 1950 ille comenciava studiar medicina. Ille habeva nulle problemas con le theoria, ma ille non poteva tolerar le practica e pro isto resignava le studiar. Postea ille laborava in qualque institutiones, in le quales ille esseva gerente de sectiones. De 1978 a 1983 Jerzy Dembicki functionava como secretario, alora practicamente chef, del Consilio Provincial del Cruce Rubie Polonese in Nowy Sacz. Verso le fin de 1983 ille se retirava.

Durante le secunde guerra mundial su patre esseva deportate a Siberia. Un fratre del granmatre, qui esseva vice-burgomaestro e postea burgomaestro de Cracovia, esseva assassinate per Gestapo.

Su ingagiamento pro lo que ille considerava juste e bon, deveniva forsan un del causas immediate de su morte: un conflicto concernente un injustitia del precios del appartamentos in casas vicin demandava un reunion del locatores. Participante in iste reunion Jerzy Dembicki esseva sur le puncto de prender le parola pro defender su opinion quando, pro le excitamento, ille subito esseva frappate per un infarcto cardiac e moriva.

Con Jerzy Dembicki UMI perdeva un membro profundemente cultivate, un homine affabile e genuinmente bon.

Redaction: Th. Breinstrup, Ingvar Stenström e Jesper Olsson
Copyright © 2001-2007 Union Mundial pro Interlingua