 |
||||||||||||||||||||||||||||||||||||||||||||||||||||||||||||||||||||||||||
 |
||||||||||||||||||||||||||||||||||||||||||||||||||||||||||||||||||||||||||
 |
||||||||||||||||||||||||||||||||||||||||||||||||||||||||||||||||||||||||||
|
||||||||||||||||||||||||||||||||||||||||||||||||||||||||||||||||||||||||||
|
|
 Stanley A. MulaikStatos Unite de America Un message in interlingua expedite a un gruppo de novas electronic in Internet revitalisava le ancian interlinguista in Ph.D. Stanley Allen Mulaik. Le svedese Kjell Rehnström, antea consiliero del Societate Svedese pro Interlingua, scribeva in le foro electronic sci.lang in interlingua. Stan Mulaik assi discoperiva que interlingua es in plen vita, mesmo si ille non lo habeva usate pro quasi 25 annos. Stan Mulaik nasceva in Edinburg, Texas, ma habitava in Salt Lake City ab le etate cinque a 27. Durante le recente 30 annos, ille es residente in Atlanta, Georgia. Ab le casa in Marietta, 32 km nord-west de Atlanta, ille cata die expedi su preciose reportos del vita quotidian per Internet. Ille anque es un grande commentator in plure foros electronic, ubi ille utilisa cata occasion pro scriber super – e specialmente in – interlingua. Nam demonstrar le lingua es plus convincente que parlar super illo. In 2000 ille se pensionava ab le professorato a Georgia Institute of Technology in Atlanta, ubi ille inseniava statistica e theoria de personalitate. Stan Mulaik discoperiva interlingua in 1953 per leger Science News Letter, ubi dr. Alexander Gode traduceva summarios de cata articulo in interlingua. Ille acquireva le "Interlingua-English Dictionary" e le "Interlingua Grammar" e apprendeva interlingua. In le magazin litterari del Universitate de Utah, ubi ille esseva studente, ille scribeva un breve articulo super interlingua. Le articulo esseva inviate a Alexander Gode, qui lo appreciava e demandava le permission de reproducer e circular lo a usatores de interlingua. Isto esseva le comenciamento de un correspondentia continue con ille durante le annos sequente. In 1961, como practicante pro un diploma de psychologo clinic, Stan Mulaik visitava Nove York, e Alexander Gode esseva generose in permitter le a remaner in su casa in Croton-on-Hudson, usque ille obteneva location. Durante le sex menses, que Mulaik esseva in Nove York, ille visitava cata septimana Alexander Gode in su officio a 80 East 11th Street. Plus tarde, Stan Mulaik comenciava editar le jornaletto periodic, "Le Foro", dedicate a topicos super interlingua. Interesses professional e su familia le duceva foras de interlingua, e post 1975 ille habeva poc connexion con interlingua. Usque veniva le message de Kjell Rehnström... Stan Mulaik ora es multo active pro interlingua e participava anque in le labor de establir un nove organisation nordamerican pro interlingua. Ille es hodie le presidente del Societate American pro Interlingua e labora con un electronic dictionario espaniol-interlingua-espaniol con le adjuta per Internet de collaboratores ab tote le mundo. Pro octo annos ille esseva le redactor de un jornal professional, "Multivariate Behavioral Research", que es un importante jornal in le campo del statistica psychologic. Le sposa de Stan Mulaik es infirmera pensionate, professor del infirmeria al Universitate Emory in Atlanta. In su horas libere, illa es docente al Museo de Michael Carlos de artefactos e arte antique egyptie, grec e sudamerican. Le copula ha duo filios. In martio 2000 illes deveniva granparentes de novo. Revidite: 2006-12-29 |
|
|||||||||||||||||||||||||||||||||||||||||||||||||||||||||||||||||||||||
|
||||||||||||||||||||||||||||||||||||||||||||||||||||||||||||||||||||||||||
| |
||||||||||||||||||||||||||||||||||||||||||||||||||||||||||||||||||||||||||
Redaction:
Th. Breinstrup, Ingvar Stenström e Jesper Olsson |
||||||||||||||||||||||||||||||||||||||||||||||||||||||||||||||||||||||||||
