|
 |
Mi prime contacto
con interlingua
Panorama ha demandate a un serie de usatores de interlingua, como esseva lor prime contacto con le lingua. Lor narrationes es instructive, a vices curiose, surprendente e amusante.
(Publicate in Panorama in Interlingua, maio-junio 2002)
BENT ANDERSEN (Danmark), vice-presidente del Union Danese
pro Interlingua, ex-administrator del Union Mundial pro Interlingua:
In mi juventute io habeva per autostudio apprendite esperanto, e essente in 1951 empleate in Odense como neo-educate inseniante, io me faceva membro del Club Esperanto ibi. Per hasardo io mentionava a un co-membro que il me interessarea facer le cognoscentia de ido e altere tentativas de reformar esperanto. "Ah, in tal caso tu deberea prender contacto con nostre membro
H. P. Frodelund, qui se ha occupate multo de tal projectos." Il se monstrava que Frodelund (plus tarde redactor-in-chef de Currero) esseva collega inseniante justo al schola ubi io esseva temporarimente empleate! Ille specialmente me dava multe materiales de occidental (interlingue). Inter istos un numero del parve revista "Buletine pedagogic international", de octobre-decembre 1949, in le qual esseva citate excerptos – in interlingua – de litteras ab
Alexander Gode a duo correspondentes francese. Io legeva e relegeva iste 12-13 lineas e quasi immediatemente faceva mi decision: interlingua es mi selection.
Revidite: 2006-12-29 |
|
|
