Mi prime contacto
con interlingua
Panorama ha demandate a un serie de usatores de interlingua, como esseva lor prime contacto con le lingua. Lor narrationes es instructive, a vices curiose, surprendente e amusante.
(Publicate in Panorama in Interlingua, novembre-decembre 2002)
HORACIO MARTINEZ (Argentina), representante de interlingua
in Argentina:
Desde parve io sempre era interessate in linguas. Quando io habeva octo annos arrivava a me un micre dictionario multilingual ubi il habeva parolas simple con le traduction correspondente a varie linguas, inter illos esperanto. In ille tempore io credeva natural que il deberea haber un lingua international ma le annos posterior me demonstrava que isto non era tanto simple.
Tunc, in 1992, io legeva un articulo de Isaac Asimov ubi ille parlava super le question de un lingua mundial. Ille articulo era un nove impulso a mi oblidate interesse. Quando in 1996 io habeva pro prime vice accesso a Internet un del prime cosas que io cercava era super esperanto, e acquireva certe material como un curso electronic e un dictionario. Ma tosto io esseva disillusionate per le difficultate de practicar le lingua e que illo non era tanto simple como illo pareva initialmente.
Finalmente in 1999 io legeva un articulo in anglese de un fanatic esperantista ubi ille criticava durmente un lingua appellate Interlingua de que io nunquam habeva audite antea; e le facto magic occurreva: cercante in Internet io trovava le sito official de interlingua e io restava surprendite.
Como era il possibile que io non haberea trovate iste meravilia anteriormente? Mi enthusiasmo me portava a abonar me al lista electronic de discussiones in interlingua, Interlng, e a componer mi prime messages in interlingua a pena un mense depost que io cognosceva le lingua! Incredibile!
Le factos posterior me portava a crear un sito in Internet pro divulgar le lingua al hispanophonos e a laborar in le redaction de un glossario espaniol-interlingua in collaboration con
Stan Mulaik (SUA).
Mi proxime objectivo es poter participar in alcun conferentia international, ma vermente con le question economic in mi pais illo pare hodie plus difficile que in le passato.
Revidite: 2006-12-29 |
