Bjarner Svejgaard Nielsen

Danmark
24 de novembre 1919 - 22 de septembre 1988

Bjarner Svejgaard es cognoscite pro le GIER, un enorme computator que ille co-inventava pro surveliar satellites. Ma ille anque esseva un fervide activista pro interlingua in Danmark.

Ille nasceva in Århus in 1919 e deveniva studente in 1937. Ille esseva cand. mag. in mathematica, physica, chimia e astronomia ab Århus in 1946 e plus tarde magistro de geodesia. In 1947 ille esseva empleate al curso de studentes del Lagtinget (parlamento) al Insulas Feroese, e in 1949 al Instituto Geodetic. In le annos 1950, ille dirigeva tres expeditiones al plus nord de Groenlandia pro mesurar le gravitate. Pois ille esseva pionero del inseniamento computatorial al Universitate de Copenhagen.

In 1968 Bjarner Svejgaard deveniva director del novemente establite centro computatorial regional al Universitate de Aarhus in Jutlandia, ubi ille durante le sex annos le plus recente habeva essite lector de datalogia. Al Instituto Geodetic ille co-inventava "Geodætisk Instituts Elektroniske Regneanlæg" (Installation Electronic pro Calculationes al Instituto Geodetic), abbreviate e cognoscite publicamente como GIER. Illo esseva designate pro surveliar satellites in Australia e stava in le cellario detra le Instituto de H.C. Ørsted. GIER habeva un capacitate de 5.000 (cinque milles) signos. Simultaneemente ille inseniava le prime cursos de computatores.

Bjarner Svejgaard esseva un genio lingual qui maestrava le difficile lingua groenlandese e linguas tsigan, e ille esseva un multo usate orator in Danmark e al estraniero, p.ex. al Universitate de Sorbonne in Paris, Francia. Ille obteneva interesse pro interlingua per un articulo in un jornal e participava tosto inter le danese interlinguistas active. Al Prime Congresso de Endocrinologia in Copenhagen in 1960 Bjarner Svejgaard participava con Alexander Gode e Poul Moth in le labor de traducer centos de summarios in interlingua. Le resultato esseva un obra in duo spisse volumines. Un cadita con le bicycletta resultava in un clavicula frangite, e le prime pensata de Svejgaard esseva que ora ille anque non habeva tempore pro prender cura del congresso endocrinologic. Svejgaard esseva in ultra gerente de un servicio de traductiones scientific sub le Union Danese pro Interlingua (DIU). Illo esseva establite a un incontro in le 1950s. Al mesme incontro Jørgen Kofod-Jensen deveniva tresorero. Un altere membro, Jan Casse, refusava le posto con le explication: "Ben, io non pote haber lo, solmente a causa de mi nomine."

Ab le fundation del DIU le 9 de novembre 1960 a martio 1963, Bjarner Svejgaard esseva consiliero danese. Ille tirava su amico, Hans Neerbek, a in le labor e editava in 1956 al Instituto Geodetic un quaderno de 30 paginas con T. Krarup sub le titulo "A Method for Matrix Multiplication, Matrix Inversion, and Problems of Adjustment by Punched Card Equipment". Le libro contine como le prime publication scientific in Danmark un summario in interlingua de 10 lineas.

Depost su cambiamento al universitate de Århus in Jutlandia, le profession prendeva tote su tempore. In vinti annos depost 1968 ille ha essite director del centro regional pro EDT al Universitate de Århus, ubi in plus ille inseniava datalogia le ultime sex annos. Le faceres professional impediva un activitate additional pro interlingua, ma su labores pro interlingua esseva sempre considerate multo competente e ille mesme un persona multo amabile.

Bjarner Svejgaard moriva le 22 de septembre 1988, 69 annos de etate, post haber essite malade e esseva interrate a Vestre Kirkegård in Århus le 29 de septembre.

Revidite: 2012-10-14  

Redaction: Th. Breinstrup, Ingvar Stenström e Jesper Olsson
Copyright © 2001-2012 Union Mundial pro Interlingua