Timbros de collector in interlingua

Le regno le plus micre del mundo usa interlingua como lingua official e anque edita timbros in interlingua.

Timbros de Elleore, 1992. Designo: Henrik Breinstrup Per Thomas Breinstrup
e Ole Silau Anesiold-Damsøe,
granduce de Kajsnude, director general postal

Le parve insula Elleore, que se appella le regno le plus micre del mundo, ha plure vices editate timbros in interlingua.

Elleore es un micre insula, situate in le Fiord de Roskilde in Danmark. In 1944, illo esseva comprate per un gruppo de professores, que comprehendeva Hans Neerbek, plus tarde co-fundator e prime vice-presidente del Union Danese pro Interlingua. Le insula esseva tornate in un regno - como joco -, e in 1962 interlingua esseva introducite como lingua official.

Elleore ha antea usate interlingua pro timbros de Natal. Le timbros de Elleore ha devenite objecto de collectores in tote le mundo, mesmo si illos non es recognoscite per ulle systema postal extra le parve regno.

Le prime timbro de Natal

Timbro de Elleore, 1962 In 1962, le prime timbro de Natal de Elleore esseva editate. Isto non esseva pro ganiar moneta. Elleore non habeva jammais habite invenitos del timbros.

Ma ora existeva le proprie servicio monetari e bancari. Elleore habeva su proprie timbros, dunque il esseva solmente pro participar in toto, que le timbro de Natal esseva introducite.

Isto se monstrava esser le successo le plus grande pro le servicio postal del regno. On vendeva 600 exemplares pro le precio de 10 øre per pecia. Pois que il habeva nulle expensas, isto significava un invenito de 60 coronas. Le successo debeva esser persequite, e iste anno (2001) le serie numero 40 essera editate!

Varie artistas ha designate le timbros. Durante le prime tres annos esseva le granduce mesme qui designava - pois veniva alumnos e mesmo le pictor danese Per Arnoldi ha designate un del marcas.

Le timbro del Landcadetacademiet (LCA)

Timbro de Elleore Elleore sempre se ha sentite menaciate per le grande poter Danmark que circumfere tote le regno - totevia con aqua inter le duo partes. Pro isto Elleore ha sempre habite un defensa vermente efficace que se approxima a 200 pro cento del population. On debe comprender lo in le maniera que quasi omnes prende parte in e le defensa militar terrestre e in illo marin, e de isto resulta le 200 pro cento.

Que illo ha essite necessari, monstra le eventos in 1969. Roskilde deveniva grande municipio e annecteva sin negotiationes Elleore in le grande municipio. Isto esseva troppo pro Elleore. Le disputa resultava in que Roskilde inviava le Guarda de Sct. Jørgen (un guarda multo pacific de musica, red.) sub gerentia de Hakon Mielche (famose autor danese de viages, red.) a Elleore pro, con fortia, conquirer le regno.

Le battalia finiva sin un ganiator. Isto resultava in "le Pace de Roskilde 1969". Desde alora le duo paises ha vivite in tolerantia le un con le altere.

Le slogan del Academia del Cadettos Terrestre es "Dice que tu vole - crede que tu pote - alora tu pote!"

Le timbro de Europa de 1966

Timbros de Elleore. Pro celebrar le Europa unite, le paises del Association Europee de Libere Cambio editava un timbro commun. Elleore anque participava con un variante que sin problemas poteva entrar inter le timbros del AELC del collectores. Le texto diceva: "Elloria - le omphalo de Europa".

30 annos con interlingua

In 1992, le Direction General Postal del regno Elleore publicava quatro timbros con differente valores: 0,17, 0,50, 0,71 e 1,00 Leo d'Or (secundo le ancian rege, Leo). Isto esseva pro celebrar le "Die de Interlingua" le 15 de januario e le 30-esime anniversario del introduction de interlingua como lingua official sur le parve insula. Le timbros esseva designate per Henrik Breinstrup, Danmark. Le motivos es un portrait del conte feudal, mag. scient. Bjarner Svejgaard (1919-1988), qui anque esseva pionero de interlingua, e le copertura del libro "Ud med sproget!" per Thomas Breinstrup de 1991. Le mini-serie comprehende quatro timbros in colores blau, gris, orange e rubie con o sin perforation.

Le prime moneta

Moneta de Elleore. Le prime moneta de Elleore valeva 11 disser - a ille tempore un valor equivalente cinque coronas danese. Le moneta es coperite per argento. Le valuta monetari disser ha hodie cessate. Ora es solmente usate Leo d'Or secundo le ex-rege. Un Leo d'Or equivale 17 coronas danese.