Magazin con mission

"Interlingua at work" non deveniva jammais le mensual de novas que esseva le intention. Ma illo deveniva un magazin con un mission.

Per Thomas Breinstrup

"Con iste edition "Interlingua at work" face su inclination como un circular mensual de novas devotate al servicio de interlingua. Illo es publicate per le Societate American pro Interlingua, e naturalmente un de su functiones essera reportar super le activitates de iste organisation; illo servira como un medio de communication inter membros del AIS. Illo essayara servir al movimento de interlinua primarimente per presentar simple reportos factual del utilisation practic de interlingua. Illo non participara in propaganda pesante, credente que le optime propaganda es le propaganda del action, e que le maniera vermente convincente de demonstrar le usabilitate de interlingua es demonstrar Interlingua at work."

Assi esseva presentate le magazin "Interlingua at work" per le signatura HEB, su redactor Hugh E. Blair, in le prime edition de augusto 1962. Ma le magazin - totalmente in anglese - non deveniva jammais un mensual. Solmente tres editiones appareva inter augusto 1962 e augusto 1964. Al altere latere, "Interlingua at work" adjutava al establimento del Societate American pro Interlingua, e illo faceva le labor e nomine de Hugh E. Blair plus visibile pro le multe usatores de interlingua in tote le mundo.

E - ante toto - illo esseva in anglese, le lingua materne del publico al qual illo se adressava. Le idea esseva demonstrar le multe activitates in e pro interlingua in tote le mundo pro un publico anglophone, e le optime methodo pro capturar le interesse de illo es naturalmene presentar lo in le lingua que illes mesme parla.

Le tres editiones esseva scribite in un tono enthusiastic e dava multe exemplos e factos de como interlinga esseva usate in le mundo. Le prime edition describe le fundation del Societate American pro Interlingua, e le tertie edition reimprime in dece del dece-duo paginas le discurso que Alexander Gode presentava al Association Medic American-Hungare venerdi le 14 de februario 1964.

Il ha anque un curso elementari de interlingua, presentava non minus enthusiasticamente per Hugh E. Blair mesme.

In le prime edition esseva includite un scheda de carton (in basso) pro inscriber se in le Societate American pro Interlingua. Con numero duo veniva un folio de reclamo pro le mensual summario del novas del scientia in interlingua, "Scientia International", editate per Science Service.

Le adresse del magazin esseva: INTERLINGUA AT WORK, Hugh E. Blair, Editor, 80 East 11th St., Room 627, New York 3, New York.

Editiones de "Interlingua at work":

• Vol. 1, no. 1, augusto 1962 (12 paginas A5)
  Contento: "American Interlingua Society", "Election of officers", "Interlingua at work" (HEB), "Novas de interlingua" (AG), "Le Foro - a Journal of Discussion" (SAM), "Congresses" (AG), "The Alice V. and Dave H. Morris Memorial" (HEB), "An invitation to join the American Interlingua Society", "Spectroscopia Molecular" (FFC), "Interlingua step by step - An Elementary Interlingua Course - Foreword" (Hugh E. Blair), "New York Metrpolitan Chapter"
     
• Vol. 1, no. 2, februario 1963 (8 paginas A5)
  Contento: "Do they dare debate the issues?" (Hugh E. Blair), "Scientia International", "An apology" (HEB), "Election of officers", "Where is Interlingua taught?" (HEB), "Interlingua step by step - An Elementary Interlingua Course - Lesson I" (Hugh E. Blair), "Letters from our readers" (HEB), "An invitation to join the American Interlingua Society", "The Alice V. and Dave H. Morris Memorial" (HEB), "The International Language Review", "Dr. Gode's challenge to the Esperantists"
     
• Vol. 1, no. 3, augusto 1964 (12 paginas A5)
  Contento: "Gode discusses Interlingua at meeting of American-Hungarian Medical Association" (Alexander Gode), "An invitation", "The Alice V. and Dave H. Morris Memorial" (HEB), "Interlingua step by step - An Elementary Interlingua Course - Lesson II" (Hugh E. Blair), "Novas de interlingua", "Currero".

Revidite: 2006-12-29
  

Redaction: Th. Breinstrup, Ingvar Stenström e Jesper Olsson
Copyright © 2001-2007 Union Mundial pro Interlingua