|
Iste logo del edition electronic de Panorama esseva designate per
Paolo Castellina (Suissa) in junio 1998 e remane ancora le marca de
identitate.
Novas electronic
de interlingua
Pioneros con perspectiva placiava Panorama in Internet, primo
con partes del magazin imprimite, plus tarde con novas actual de
interlingua.
Per Thomas Breinstrup
Desde le initio de 1999, Panorama ha livrate actual novas electronic de interlingua in Internet.
Ma su presentia in Internet comenciava tres annos antea con le bon
voluntate de adjutatores vidente le perspectivas.
Pro non competer con le magazin imprimite, que vive del abonamento que le lectores paga, le servicio electronic ha sempre servite novas como notitias informative. Le detalios on pote leger sempre in le magazin mesme.
Le idea de novas actual de interlingua veniva del pionero interlinguistic de Internet,
Paolo Castellina (Suissa), qui in februario 1997 a su sito in Internet presso GeoCities poteva offerer un servicio.
"Sur le prime pagina de mi sito il ha un nove icona. Cliccante lo vos pote acceder a un ver jornal quotidian electronic componite secundo le themas de mi selection e contenente articulos de importante agencias de pressa (Reuters, CNN etc.). Le themas es politica e factos international, novas del technologia e del scientia, novas del mundo christian e novas cinematographic. Naturalmente tote isto es in lingua anglese... Io potera "nutrir" iste mi jornal con toto lo que io vole, ma io debe apprender como facer lo. On poterea haber probabilmente anque novas de Interlingua," ille assi scribeva.
Ille proponeva que on poterea haber un simile pagina - anque con GeoCities - con un simile servicio in interlingua.
"Esque io sonia troppo?" ille demandava.
In 1999, le idea finalmente se realisava. Panorama relanceava su sito e cambiava le contento.
"Al adresse http://start.at/interlingua on pote sequer le novas de interlingua in forma summarisate. Le intention es dar un supervista sempre actual de novas - grande o parve - ab le mundo de interlingua. Le novas essera tractate anque in le Panorama imprimite e in forma extense - ma solmente cata duo menses quando appare un nove edition," scribeva assi le redactor, Thomas Breinstrup, in le edition martio-april 1999 del magazin.
De Suissa a Svedia
Ma ja in le initio de 1996 Paolo Castellina como presidente del Union Interlingua de Helvetia establiva un presentia in Internet "con informationes super le organisationes national de interlingua con nomines, adresses, telephonos, adresses electronic, precios de membrato, precios de abonamentos, factos super le histoia de interlingua, super le uso de interlingua, super le vocabulario de interlingua etc., etc., etc. On mesmo pote vider un photo de
Alexander Gode, le ultme redactor in chef del "Interlingua-English Dictionary"." (Panorama 1/1996)
E post alcun septimanas, le edition januario-februario 1996 de Panorama "deveniva le prime, que usatores de computatores in tote le mundo poteva leger sur lor schermos per Internet," como se scribeva in Panorama 2/1996. "On pote leger tote le textos per cercar los in un indice o on
pote premer buttones pro arrivar directemente al multe novas publicate." Le adresse esseva le non charmante
http://ourworld.compuserve.com:80/ homepages/ Paolo_Castellina/
panorama.htm.
In septembre 1996, le adresse de Panorama cambiava de Suissa a Svedia. Le cambio habeva un fundo felice: le grandissime numero de materiales informative habeva plenate le machineria in Suissa, e pro isto Panorama se trovava ora inter le multe materiales scandinave al sito de
Jan Årmann, presidente del Societate Svedese pro
Interlingua (http://ourworld.compuserve.com:80/ homepages/
jan_armann/ panorama.htm). Ille hospitava in avantia alcun paginas pro le Union Danese pro Interlingua. Paolo Castellina continuava como le designator del paginas post que cata edition habeva apparite sur papiro.
E iste collaboration durava usque le establimento de un proprie sito de Panorama
in justo GeoCities tres annos plus tarde.
Ma in maio 2002, le adresse cambiava de novo. Assi on legeva al
sito:
"Panorama ha obtenite un nove adresse permanente in Internet. Le adresse http://start.at/interlingua ora redirige le visitatores a www.interlingua.dk/panorama. Le ration pro cambiar es que Geocities, ubi Panorama ha essite hospitate desde le initio, ha essite comprate per Yahoo que essaya fortiar le possessores del sitos a pagar pro esser in le communitate. Le passo le plus recente ha significate que on non plus pote inviar filas directemente - e assi revider rapidemente le paginas con novas - ma debe passar per un instrumento de Yahoo, si on non vole pagar. In practica, solmente illes qui ha conservate un ligamine directe al pagina de Geocities, es toccate per le cambio."
Como parte de un strategia de fortificar le presentia de
interlingua in Internet, le edition electronic de Panorama deveniva le
8 de martio 2003 un parte integrate del prime pagina de www.interlingua.com,
le sito del Union Mundial pro Interlingua. Per demonstrar le
activitates pro interlingua, le sito pote attraher ancora plus de
interessatos - anque interessatos qui retorna sempre pro leger novas e
sequer le developpamento. Assi le UMI es anque fortificate.
Independente del adresse, le novas continua fluer al publico
mundial, anque in le version electronic.
Le edition electronic de Panorama de septembre-octobre 1997.
Redigite:
2006-12-29
|
