Tres membros extra entra in le Consilio de Administration del UMI ab januario.

UMI  Il ha un grande interesse pro participar in le labor de promover interlingua.

Isto esseva demonstrate, quando le Union Mundial pro Interlingua (UMI) teneva su annual assemblea general le 30 de julio 2023 durante le 25e conferentia international de interlingua in Varsovia, Polonia.

Pro le election de membros del nove Consilio de Administration, que substitueva le ancian Consilio Executive e le Consilio General del UMI, il non solmente habeva tante candidatos que le Consilio de Administration attinge su maximo de personas (i.e. novem) contra usque ora sex consilieros. Un serie de participantes in le assemblea indicava que illes essera candidatos potential quando le proxime assemblea general essera tenite in 2024.

Duo consilieros actual – Madeleine Mahé (Francia), qui es desde januario 2020 le presidente del UMI, e Barbara Rubinstein (Svedia), presidente del Societate Svedese pro Interlingua – poteva esser reeligite, lo que occurreva, e tres personas extra se poneva a disposition e anque esseva eligite. Il se tracta de Carmelo Serraino (Italia), Grzegorz Kondrak (Canada) e Donald Gasper (Grande Britannia). Omnes tres ha usate interlingua durante multe annos e entra ora in le labor del UMI pro facer interlingua plus visibile e plus usate.

Grzegorz Kondrak■ Grzegorz (Greg) Kondrak (nascite in 1965 in Varsovia, crescite in Kielce in Polonia) vive desde 1990 in Canada, ubi ille es professor de informatica in le Universitate de Alberta in Edmonton. Greg Kondrak ha scribite plus que 100 articulos scientific super linguistica computational e plure articulos in Panorama. Ille esseva inamorate in interlingua desde le prime vista in 1995. Ille participava brevemente in le conferentia international de interlingua in Benidorm, Espania, in 2015, con su duo filios, del quales le plus vetere, Tadeo, ha create 2.500 cartas in le app mobile Anki pro apprender interlingua.

Donald Gasper■ Donald (Don) Gasper (nascite in 1950) es jornalista/redactor e inseniante in diverse universitates e institutos. Ille ha durante plure annos vivite in Hongkong ma vive ora de novo in Grande Britannia. Ille studiava sinologia in le Universitate de Cambridge e postea London University (School of Oriental and African Studies), Glasgow University, Beijing Language Institute, Beijing Language and Culture University e Nanjing University. Su interesses comprehende linguas e culturas de differente paises, arte, litteratura, viages (ille es un participante regular in conferentias de interlingua depost 1987), historia, interlinguistica e affaires international. Donald Gasper apprendeva super interlingua circum le anno 1965, gratias a un articulo in “Lingua e Vita”, le organo del Societate Britannic pro Interlingua, publicate in ille anno.

Carmelo Serraino■ Carmelo Serraino (nascite 1946) vive in Milazzo sur Sicilia in Italia e es educate ingeniero electronic in 1971 ab le Schola Polytechnic in Torino. Ille labora con energia renovabile e le ambiente. Ille discoperiva interlingua in 2011. Desde 2012 ille ha traducite software ab Mozilla, OmegaT, Ubuntu e Linux Mint in interlingua. Ille ha participate in le registration del lecturas biblic in interlingua sub Paolo Castellina. Carmelo Serraino ha participate in plure conferentias international de interlingua e incontros nordic de interlingua.

In le Consilio de Administration remane Julian Mendez (Germania, secretario general), Martijn Dekker (Nederland, vice-secretario), Alberto Mardegan (Russia, tresorero) e Thomas Breinstrup (Danmark, redactor del Panorama in interlingua).

Le nove Consilio de Administration de novem personas comencia su function le 1 de januario 2024. Le duo membros reeligite e le tres nove membros functiona usque le 31 de decembre 2026.

Quando le nove Consilio de Administration se assembla, on va distribuer le postos de presidente, secretario general, vice-secretario, tresorero e consilieros ordinari inter se secundo le statutos, e alora comencia le ver labor.