Panorama ha 25 annos
Le prime edition de Panorama in interlingua (numero tres ab sinistre) ab januario-februario 1988 - le resultato de un fusion de Heraldo de Interlingua (toto a sinistre) e le organo official del UMI, Currero (numero duo ab sinistre). A dextere, le edition le plus recente de novembre-decembre 2011 in colores pro le abonatos digital.
Le magazin official del Union Mundial pro Interlingua celebra su prime grande jubileo. Invia un felicitation al magazin.
Plus que 4.000 paginas completemente in interlingua ha apparite desde le primissime edition del magazin international de novas Panorama in interlingua appareva in januario-februario 1988. Ora Panorama entra in su anno jubilari: 25 annos de publication.
Durante tote 2012 le abonatos va reciper como Extras le correspondente edition de Panorama de 1988, i.e. le prime sex editiones del magazin in un version digital, e il essera possibile inviar un felicitation al magazin per medio de iste pagina. Plus de activitates jubilari es sub preparation.
Panorama in interlingua (ISSN 0903-2932) appareva como un fusion del bimestral private "Heraldo de Interlingua" e le magazin official del Union Mundial pro Interlingua, "Currero". Le desiro esseva crear un moderne magazin pro lectores international. Le establimento del nove magazin con informationes international in interlingua esseva un realitate durante le 8ve Conferentia International de Interlingua in Paris, Francia, e un medie anno plus tarde appareva le prime edition que esseva multo ben recipite.
Desde alora Panorama ha apparite omne duo menses. In total - inclusive le edition jubilari - con 4.060 paginas in 145 editiones, plen de novas international, novas de interlingua, interviews, reportages, recensiones de libros, exercitios, litteratura, nomines, notitias etc.
Supporta le jubileo per devenir abonato. On pote abonar se al version imprimite o version digital in colores que es livrate directemente in le cassa e-postal pro un precio reducite.
Lege le grande articulo jubilari in Panorama januario-februario 2012.
Lege plus in le Historia de interlingua: Un fusion frigide deveniva Panorama | Le schizzo confidential
Lege plus super Panorama, como abonar se e usar le indice del contento 2007-2011: Panorama in interlingua
Invia felicitationes a Panorama
Utilisa iste formulario (le campos indicate con asterisco (*) es obligatori) pro inviar tu bon desiros pro le labor de interlingua. Omne salutes - parve e grande - es multo benvenite.