Retrovista al revista
official del UMI

Un ver magazin official del Union Mundial pro Interlingua existeva solmente un anno post le fundation del organisation. Ma isto non significava que le membros non esseva ben informate.

Per Thomas Breinstrup

538 paginas multicopiate per duplicator in le formato A4 comprehende le prime bulletines publicate per le Union Mundial pro Interlingua (UMI) durante su prime decennio. Omnes es hodie exhaurite.

Le initiator e prime director, postea secretario general, del UMI esseva le suisso André Schild (1910-1981), plus tarde anque le secretario del Fundation Bakonyi pro Lingua Universal, que supporta nove initiativas pro diffunder interlingua.

De 1959 a 1963 le secretariato general esseva assumite per professor Ric Berger (1894-1984), Suissa, qui plus tarde establiva le interprisa Editiones Interlingua e publicava le independente, illustrate Revista de Interlingua, in le qual esseva occasionalmente reproducite paginas ex le supra-mentionate bulletines exhaurite. Le revista claudeva con le morte de Ric Berger in 1984.

In 1964 le homine prime de interlingua, dr. Alexander Gode de New York, deveniva secretario general del UMI. Ille esseva alora chef del Division de Interlingua del firma Science Service e plus tarde establiva su proprie firma, Interlingua Translations. Ille initiava le nove serie del magazin Currero, distribueva diverse circulares e imprimitos al membros, e continuava le publication del independente Novas de Interlingua usque al fin de 1967. Dr. Gode decedeva in 1970 post un longe e maligne maladia.

Ronald Spathaky, Grande Britannia, assisteva 1955-1960 como redactor general e litterari del Currero, e ab 1966 a decembre 1984 H.P. Frodelund, Danmark, esseva redactor in chef. Ab januario 1985 a junio 1987 Karel Wilgenhof, Nederland, redigeva le magazin, ab julio a septembre 1987 Brian C. Sexton, Grande Britannia, e le ultime numero - 90 - in octobre-decembre 1987 esseva redigite per Ferenc Jeszenszky, Hungaria.

Le duo periodicos, Currero e le private Heraldo de Interlingua (establite in augusto 1981 per Thomas Breinstrup, Danmark), fusionava al nove Panorama, cuje prime edition appareva in januario-februario 1988 e ha desde alora essite publicate omne duo menses. Cata edition contine 28 paginas A5 totalmente in interlingua.

Un reorganisation del UMI occurreva in 1970.

Chronologia del prime annos del Currero

Le organo official in le prime annos del Union Mundial pro Interlingua:

Circular al cognoscitores e amicos de Interlingua: 1954 (Basel), 22 de februario

Circular al prime membros del UMI: 1954 (Basel), 26 de maio

Lista del membros: 1954 (Basel), augusto

Bulletin del Union Mundial pro Interlingua: 1954 (Basel), octobre; 1955 (Basel), januario, martio, junio

Union Mundial pro Interlingua (UMI): bulletin publicate per le Secretariato General, 1955 (Basel), augusto

Le Currero del Mundo: revista mensual in interlingua, 1955 (Basel), nos. 1-4 (septembre-decembre); 1956 (Basel), nos. 1-12 (secunde anno); 1957 (Basel), nos. 1-8 (tertie anno)

Bulletin de Interlingua: 1957 (Basel), nos. 9-12 (tertie anno); 1958 (Basel), nos. 1-12 (quarte anno); 1959 (Morges), nos. 1-5 (quinte anno, januario-junio)

Informationes del Secretariato General de Interlingua: 1959 (Morges), april, julio

Currero International: 1959 (Morges), septembre-octobre, novembre-decembre; 1960 (Morges), cinque quadernos; 1961 (Morges), cinque quadernos; 1962 (Morges), cinque quadernos; 1963 (Morges), cinque quadernos.

Revidite: 2006-12-29

Redaction: Th. Breinstrup, Ingvar Stenström e Jesper Olsson
Copyright © 2001-2007 Union Mundial pro Interlingua