"Nove lingua attrahe multes" scribe le jornal regional svedese Motala-Vadstena Tidning le 31 de julio como rubrica de su reportage del 10-me incontro nordic de interlingua. Le incontro jubilari attraheva participantes del quatro paises nordic, de Espania, de Germania e mesmo de Japon pro cursos intensive de interlingua durante tres dies sequite per tres dies del incontro nordic, ubi on discuteva planos de collaboration nordic. Le articulo narra de interlingua e le activitates al incontro, i.a. le grande demonstration a transverso del urbe hospite Vadstena, vicin al grande laco Vättern, sabbato. Le incontro durava del 26 al 30 de julio. Reportos plus detaliate sequera in le magazin nordic Actualitates e in Panorama, publicate per le Union Mundial pro Interlingua.
