Valter Ahlstedt

Svedia
Nascite: 13 de januario 1908
Morite: 25 de april 2005

Valter Ahlstedt, bibliothecario de Stockholm, es in al minus duo manieras remarcabile pro interlingua. Ille ha durante multe annos essite le mecenas facente possibile que un longe serie de interlinguistas ab specialmente Europa del Est ha potite participar in le conferentias international de interlingua. E ille - "le ultime novialista" - esseva probabilemente le sol membro vivente si longemente del pioneros de Novial, le lingua artificial elaborate per le ben cognite professor danese de anglese, Otto Jespersen, qui plus tarde participava in le elaboration scientific de interlingua. Valter Ahlstedt esseva olim le plus active novialista del mundo, plus active que le autor, Otto Jespersen, mesme.

Valter Ahlstedt nasceva in Stockholm e deveniva prime bibliothecario al bibliotheca municipal de su citate. 

In 1935-1939, ille collaborava in le magazin "Novialiste" e esseva co-redactor in 1937. Ille scribeva plure articulos con le scopo de ameliorar novial. Quando on in 1937 formava un jury lingual, Lingue-Jurie Novialisti, pro discuter le evolution del lingua, Valter Ahlstedt naturalmente participava como membro active. In su capacitate de coordinator del jury ille habeva le influentia principal in le elaboration del secunde version de Novial, que significava un approchamento de Novial a Occidental. Assi, omne deviationes del novial original, reportate in su "Gramatike interlingual" de 1947, ha essite proponite per ille mesme e esseva approbate per le jury.

Valter Ahlstedt es forsan le sol persona vivente si longemente, qui ha parlate Novial con un estraniero, a saper con Andrea Baietti in Italia durante un de su multe viages. Non existe evidentia de que Novial unquam esseva parlate per altere homines.

Valter Ahlstedt ha durante multissime annos essite un membro del Societate Svedese pro Interlingua, in cuje incontros mensual in Stockholm, Interlingua-Stockholm, ille ha participate activemente. Ille esseva bibliothecario in Stockholm como profession e ha scribite le historia del club de bibliothecarios.

Fortunatemente ille habeva un excellente memoria e conservava intacte tote su functiones mental, su humor, su interesses in linguas, musica classic e culinarismo, e a vices ille invitava su amicos a repastos de gourmets con concerto de su discos favorite. Un conversation telephonic con ille esseva anque sempre un placer.

Revidite: 2006-12-29

Redaction: Th. Breinstrup, Ingvar Stenström e Jesper Olsson
Copyright © 2001-2007 Union Mundial pro Interlingua