Ric(hard) Berger

Suissa
16 de augusto 1894 - 4 de augusto 1984

Un enthusiasta, un polemico e un motor. Tanto differente esseva le lateres del personalitate Ric Berger. Ma su grande desiro de documentar sempre toto es le causa que tante documentos historic de interlingua (e de varie linguas artificial) ha essite conservate ancora hodie, proque ille los publicava in su multissime editiones.

Ric(hard) Berger (photo del conferentia international de interlingua in Basel, 1971) nasceva in Yens in le canton de Vaud in Suissa como le plus vetere de un familia con dece infantes. In Lausanne, ille obteneva su diploma como instructor e pois studiava al mesme loco le arte. Sub le direction del pictores Buchs, Oswald e Vonlanthen ille studiava como pinger in oleo. Inter 1928 e 1963 ille esseva professor de designo, decoration e historia de arte al Collegio de Morges. Ille publicava plus que 20 libros super iste themas e super monumentos historic in Suissa.

In le etate de 18 annos, in 1912, ille comenciava interessar se pro linguas universal e deveniva esperantista ardente. Ille esseva delegato del Association Universal de Esperanto e collaborava con plure revistas. In 1918 ille cambiava a ido e scribeva activemente brochures, articulos e materiales informative. Plus tarde, in 1928, ille transversava a occidental, e le sequeva le majoritate del idistas de su region. Ille redigeva le organo official del movimento occidentalista suisse "Svissia" (1928), que in 1931 cambiava su nomine a "Helvetia". Postea, de 1934 a 1950, ille esseva co-redactor del magazin del Occidental-Union, "Cosmoglotta", e esseva le interprenditor in 1948 quando occidental - presentate per le estoniano Edgar de Wahl - cambiava nomine a interlingue. Ric Berger totevia - post haber defendite occidental - esseva persuadite del avantages de interlingua e poneva tosto in 1956 su fortias in le promotion de interlingua. Inter januario 1959 e decembre 1963 ille esseva le secretario general del Union Mundial pro Interlingua e al mesme tempore le redactor del magazin official, Currero.

"Viagiar es viver," diceva H.C. Andersen. Pro Ric Berger "scriber es viver". Su production de magazines e libros es enorme. Ille esseva le autor de un multitude de quadernos in interlingua, specialmente super le thema que le interessava multo: le historia del linguas auxiliar. Ille trovava e publicava documentos historic, e ille non abstineva jammais de commentar los e poner in le lumine aperte omne le luctas e battalias interne del varie movimentos - un facto que le assecurava multe inimicos inter le linguas artificial.

In 1966 ille comenciava publicar su magazin "Revista de Interlingua", que appareva usque 1983 como le sol mensual in interlingua. Illo esseva expedite a omne angulos del mundo. Le contento esseva variate: articulos encyclopedic, historic e alora le importante novas de interlingua. Ma sempre ornamentate per su designos - lo que non sempre addeva al vista seriose del magazin, malgrado un contento sovente ben documentate e recercate. Le "Revista de Interlingua" deveniva in toto plus que 6.000 paginas A4 expedite a 60 paises.

In ultra, Ric Berger gereva su private casa editorial, Editiones Interlingua. Ci ille publicava manuales in multe linguas e assecurava assi que manuales de "parve linguas" appareva, mesmo si le economia probabilemente non esseva presente, nam le mercato pro illos esseva minimal. Ma ille continuava expedir manuales e magazines a omnes - usatores de interlingua e opponentes de interlingua.

Ultra su multe labores pro interlingua, ille scribeva libros de arte e viages, del quales duo ha apparite in 120.000 exemplares.

Ille moriva in 1984 in Morges, Vaud.

Revidite: 2006-12-29

Redaction: Th. Breinstrup, Ingvar Stenström e Jesper Olsson
Copyright © 2001-2007 Union Mundial pro Interlingua