|
 |
Carl-Erik Boman
Svedia
Nascite: le 2 de novembre 1939
Carl-Erik Boman, ex-presidente del Societate Svedese pro Interlingua
(1984-1990), nasceva in Malmö
e studiava principalmente al Universitate de Lund, ubi ille inseniava como assistente
durante su studios. Ille elaborava un dissertation de crystallographia röntgen e deveniva
doctor phil. de chimia. Plus tarde ille esseva appunctate lektor, professor
principal, al gymnasio de Nässjö, ubi ille insenia chimia, mathematica – e
Interlingua. Boman ha un interesse vermente profunde in linguas, ha studiate russo e
chinese, e al nivello universitari anglese.
Quando ille audiva de Interlingua, ille immediatemente comprendeva le utilitate de iste
"denominator commun" del linguas europee pro le comprension del terminologias
scientific e del parolas international in le lingua svedese e initiava inseniamento de
Interlingua in su gymnasio. Su studentes apprecia multo iste inseniamento, que facilitara
lor studios postgymnasial.
Post alcun annos ille deveniva presidente de Societate Svedese pro Interlingua, post Sven Collberg e ante Bertil Palmquist,
e participava in le Conferentias International in Copenhagen (Danmark, 1985) e Zwolle
(Nederland, 1989). A causa de un grave operation ille pro le momento non insenia
Interlingua.
Carl-Erik Boman, qui ha duo filios e un filia, vive in un casa, assatis grande, que es
tanto plen de libros de su multiple interesses, que le muros a pena pote resister le
pression. Il es probabile que le numero de su libros supera illo del bibliotheca municipal
de su urbe e illos certo lo face in qualitate: ille possede raritates e libros linguistic
e scientific exquisite e probabilemente tote le libros publicate in Interlingua. |
|
|
