Helen Slocomb Eaton

Statos Unite de America
Nascite: (non cognite) 1887
Morite: (non cognite)

Le valor del labor de Helen S. Eaton, Dallas (Texas), pro interlingua e le inseniamento de education de linguas moderne es grande.

Helen Slocomb Eaton esseva diplomate del Universitate de Sorbonne in Paris, Francia, e de 1925 a junio 1942 illa esseva associato de recercas linguistic del IALA. Illa esseva inter le eminente linguistas de fama mundial qui participava como consultantes del Comité de Consultores Linguistic del IALA.

Quando IALA durante su prime annos de labor examinava le possibilitate de combinar le major linguas artificial existente, on al mesme tempore comenciava recercas extensive de comparation de linguas e de pedagogica lingual. Professor Edward Sapir del Universitate Yale gereva le accesso anthropologic al problema de un lingua auxiliar. In un tote serie sub le titulo "Foundations of Language" le habitudes typic de conversar in varie linguas esseva analysate pro certe tractos grammatic. Certe de iste studios esseva editate per le Linguistic Society of America. Alice V. Morris esseva redactor del serie con Edward Sapir, professor William E. Collinson del Universitate de Liverpool, dr. Morris Swadesh e Mary Haas Swadesh.

Al mesme tempore tractos lingual esseva comparate inter latino, italiano, espaniol, francese, anglese, germano e russo e sex linguas construite - esperanto, esperanto II (nov-esperanto), ido, novial, occidental e latino sine flexione. Inter cinque e dece-un de iste linguas esseva in uso pro le comparationes. Le formation de parolas, phonetica, un vocabulario de nucleo, flexiones e suffixos esseva le topicos le plus importante del studios. In iste equipa participava William E. Collinson, Helen S. Eaton, Henri F. Muller e George L. Trager.

Helen S. Eaton gereva un projecto special de education con le idea fundamental que interlingua (i.e. un inter-lingua) extrahite de latino poterea esser usate pro un curso simplificate de comparation linguistic pro comenciantes de un lingua estranier. Illa scribeva assi le libro "General Language Course" (editate in London 1928-1929) que esseva usate in cursos experimental a scholas que collaborava con le programma de education del IALA.

Sub direction de psychologo, dr. Edward L. Thorndike del Columbia University in New York comenciava, con le supporto ab Carnegie Corporation, sex annos de examinationes de como plus facile il esseva apprender un artificial lingua auxiliar (esperanto e ido) comparate a un lingua national (francese, germano, italiano e espaniol). Le conclusion de Thorndike esseva clar: "In toto, con un consumo de ab dece a cento horas, le acquirer de un lingua synthetic probabilemente essera de cinque a dece-cinque vices plus rapide que de un lingua natural a causa del difficultates del ultime." Le resultatos esseva publicate in "Language Learning", publicate per Bureau of Publications of Teachers College of Columbia University in 1933. Edward L. Thorndike esseva "director and supervisor", Laura H.V. Kennon "chief investigator" e Helen S. Eaton summarisator. Le titulo esseva "Language learning; a report to the International Auxiliary Language Association in the United States, incorporated by the Division of Psychology, Institute of Educational Research, Teachers College, Columbia University, New York".

Como adjuta al labor a venir del IALA de colliger un vocabulario basic, Helen S. Eaton comenciava in 1934 colliger un lista semantic de frequentia de anglese, francese, germano e espaniol. Su "Semantic Frequency List" esseva editate per le Comité de Linguas Moderne del Consilio American de Education in 1940 e contineva 6.474 notiones international. A iste tempore illa laborava al Teachers College del Columbia Universitate e esseva in ultra instructor visitante del Universitate de New Mexico.

Helen S. Eaton continuava con su interesse pro le lingua espaniol. Illa assi, con Lewis E. Brett, revideva e fortemente allargava le "English-Spanish and Spanish-English dictionary" per Arturo Cuyas, publicate per Appleton.

Bibliographia seligite:

Helen S. Eaton: "The eductional value of an artificial language", in
Modern Language Journal, New York 1927.

Helen S. Eaton (ed.): "Semantic Frequency List for English, French, German and Spanish. A Correlation of the First Six Thousand Words in Four Single-Language Frequency Lists". 441 pp., 4to. Chicago University Press, SUA, (1940). Publicate in reimpression per Dover Publications, Inc., 1967.

Redaction: Th. Breinstrup, Ingvar Stenström e Jesper Olsson
Copyright © 2001-2007 Union Mundial pro Interlingua