Jan Delnoy

Nederland
Nascite: 25 de decembre 1929
Morite: 16 de decembre 2000

Solmente un septimana ante su 71-me anniversario, Jan Delnoy, le sposo del tresorera del Union Mundial pro Interlingua, moriva. Ille non plus poteva resister al cancere que durante le ultime menses poco a poco destrueva su corpore.

Ille esseva un persona charmante, intelligente e plen de humor – e su participation sempre active e attentive combinate con su grande humor ha gaudite omnes a conferentias international e (durante le estate de 2000) al incontro nordic.

Le homine practic detra le scena nasceva le 25 de decembre 1929 in le citate Kerkrade in le provincia Limburg in le sud de Nederland. Illo es cognoscite anque como "Klein Zwitserland" (Parve Suissa). Jan Delnoy esseva ingeniero mechanic e laborava 14 annos al mina statal de carbon "Wilhelmina" in Terwinselen.

In 1957, ille se maritava con Louise Sijstermans, le tresorera-administratrice del Union Mundial pro Interlingua – e illes assi celebrava lor 40-esime anniversario de maritage le 31 de julio 1997 durante le conferentia international de interlingua in Strasbourg. Illes ha quatro infantes – un filio e tres filias. In 1969, le familia Delnoy debeva cambiar domicilio, quando le minas in Limburg claudeva. Le familia cambiava in 1989 domicilio a Raalte in le provincia Overijssel. In iste region habeva loco le 9-ne Conferentia International de Interlingua del UMI in le centro conferential "Den Alerdinck" in 1989. Isto esseva lor prime visita a un conferentia de interlingua.Jan Delnoy

Le nove profession de Jan Delnoy esseva ingeniero technic in un clinica psychiatric. Ille habeva le direction technic general de iste clinica, ubi ille laborava durante 20 annos. A su 60-esime anniversario, ille se retirava e de novo cambiava domicilio a Heeten, un parve urbe in Salland anque in Overijssel. Ora ille faceva multe cosas voluntari como secretario del education de adultos e secretario del consilio de clientes del clinica de seniores in Heeten.

Jan Delnoy amava mangiar bon e gustose, ma ille non amava facer le cocina. In su tempore libere – e si le tempore esseva plus belle – ille amava bicyclar. Con su sposa Louise, Jan Delnoy ha participate in omne conferentias recente, ubi ille ha adjutate con le financias e solvite problemas practic – sempre con un grande surriso.

Con Louise, Jan Delnoy participava in le 7-me Incontro Nordic de Interlingua in Åsa, Svedia, in le estate 2000, ubi ille como sempre esseva plen de humor e energia. Ma desde alora le tumor in un ren le vacuava de fortias. Un operation non esseva possibile, ni un tractamento chimic, e ja in octobre le medicos le dava solmente alcun menses a viver. Recentemente, ille totevia comenciava un studio intensive de interlingua pro esser preste pro le jubileo in 2001 – un evento que ille non succedeva experientiar.

Jan Delnoy moriva le 16 de decembre e esseva interrate in Heeten le 19 de decembre.

Redaction: Th. Breinstrup, Ingvar Stenström e Jesper Olsson
Copyright © 2001-2007 Union Mundial pro Interlingua