Fredy Jensen (sinistre) e William Rosenkilde studia in octobre 1967 films de Vejle durante le occupation german. Le materiales es pro le totalmente nove Archivo Historic del Urbe. Photo: Allan Simonsen/Vejle Byhistoriske Arkiv & Stadsarkivet

Fredy Jensen

Danmark
Nascite: le 4 de januario 1933
Morite: le 7 de octobre 1988

Inseniator al schola primari Fredy Jensen, Vejle, participava quasi ab le initio del Union Danese pro Interlingua, pois que ille deveniva membro in 1963. Post le retiro de plure consilieros, Fredy Jensen le 20 de april 1968 esseva proponite como nove presidente del DIU per le secretario de alora, Jørgen Kofod-Jensen, pois que Fredy Jensen esseva ille qui le plus longemente habeva essite membro del organisation. Ille acceptava e esseva eligite pro le posto, que ille presideva usque le 6-te Conferentia International de Interlingua in Taastrup, Danmark, in augusto 1985, ubi Jørgen Kofod-Jensen le sequeva, e ille se retirava del consilio danese.

Fredy Jensen supportava interlingua, anque generosemente per su membrato. Totevia ille non habeva jammais le tempore necessari pro interlingua a causa de su ingagiamento colossal in le historia local del region de Vejle, ubi ille habitava a Egernvej. Ci ille durante 13 annos gereva (non-salariate) le archivo de historia local, e a su proprie casa editorial, Humilitas ("le nomine es un referentia al facultates economic del casa editorial!") establite in 1981, ille editava dece-cinque libros pro documentar le historia local. Fredy Jensen anque habeva planos de elaborar un bibliographia super tote lo que habeva essite scribite de interlingua in danese, ma mesmo si ille succedeva colliger un poco de material, ille non habeva le tempore pro completar le labor. Un parte de su material formava le base del libro "Ud med sproget!" que Thomas Breinstrup in 1991 publicava super le historia del Union Danese pro Interlingua.

Fredy Jensen nasceva in Oeverseefeldt, Landskreis Flensburg, ma veniva a Hedensted poc dies post su nascimento. Ille frequentava le Schola de Hedensted 1940-1944 e continuava in le Schola Real de Horsens, de ubi ille le 24 de junio 1952 obteneva su examine como studente. In 1952-1954 ille esseva soldato, le ultime parte del periodo in le brigada danese in Itzehoe.

Ille voleva esser inseniator e passava su examine al Seminario de Århus in 1958 con germano como disciplina principal. In le mesme anno ille esseva empleate al Schola de Nyboesgade in Vejle, ubi ille inseniava germano, francese, latino, anglese, historia, religion e danese.

"Le corde de Fredy batteva calidemente pro le historia, le recercas folkloristic e le cultura folkloristic, lo que le lista de tote lo que ille ha publicate o redigite clarmente monstra. In ultra ille esseva solidemente fundate linguisticamente. Ultra traditional linguas scholar ille anque se occupava un poco con esperanto e assatis multo con interlingua que ille trovava le lingua auxiliar international le plus soveran," como su amico, le redactor del libro "Fredy in memoriam" (ISBN 87-88011-30-5), Flemming Sørensen, nota.

Fredy Jensen habeva le 7 de octobre 1988 un indisposition e cadeva inconsciente in le camera de professores al Schola de Nyboesgade. Ille esseva transportate al hospital e moriva, solmente 55 annos de etate.

Revidite: 2006-12-29

Redaction: Th. Breinstrup, Ingvar Stenström e Jesper Olsson
Copyright © 2001-2007 Union Mundial pro Interlingua