|
 |
Klavs Neerbek
Danmark
Nascite: 18 de septembre 1944
Director e cand. scient. Klavs Neerbek ha sempre habite interesse pro le scientias
natural. Ja in 1962 ille esseva alumno gymnasial e membro del Guarda Civil, ubi ille
debeva transportar forte tubos de radio que sovente poteva interceptar le radio policiari
in Chicago ma non le debile apparatos in le vicinitate.
Durante su tempore gymnasial, ille esseva motivate a interessar se pro processamento
textual per le legendari Bjarner Svejgaard, qui habeva
developpate "Geodætisk Instituts Elektroniske Regneanlæg" (Installation
Electronic pro Calculationes al Instituto Geodetic). Al mesme tempore, ille esseva active
in le movimento de scouts. In 1963, Klavs Neerbek deveniva studente mathematic ab le
Gymnasio de Østersøgade, ubi ille participava in le redaction del prime magazin scholar
in interlingua, "Extra-Posta", professionalmente imprimite. Le anno sequente
ille finiva su "philosophicum" in algebra boolean e esseva instructor in
chimia medicinal de 1966 usque 1969.
Post haber devenite candidato con chimia, physica e astronomia ille se educava
pedagogicamente al Schola Cathedral de Roskilde in le primavera 1970. Pois ille esseva
empleate durante novem annos al Schola Statal de Rødovre, usque le computatores le
tentava. Presso Tiger Data ille developpava un computator personal, e in 1981 ille esseva
empleate a ICL Computer. Post duo annos como professor de physica al Gymnasio Høng ille
fundava su proprie firma computatorial, Rap Soft, que produceva programmas de education
pro infantes.
Klavs Neerbek es prince hereditari al regno le plus parve del mundo, le insula Elleore
in le Fiord de Roskilde, ubi on ha desde 1962 habite interlingua como lingua official.
Desde januario 1992 ille ha essite consiliero del Union
Danese pro Interlingua (DIU). Ci ille ha combinate su interesse pro computatores e
linguas, e in 1993 appareva un version electronic del dictionarios danese-interlingua e
interlingua-danese sur un dischetto. Durante un periodo in 1994 ille gereva le Centro de
Sapientia super Interlingua (in danese: Interlingua Videncenter). |
|
|
