Francis Markstein

Canada
Nascite: (non cognite) 1914- (non cognite) 1991

Francis Markstein nasceva in Hungaria 1914. Ille compliva su scholas (primari e secundari) in hungaro. Germano e francese ille sapeva ex le schola e casa. In su juventute ille sojornava multe vices in Europa del west e anque in Scandinavia, ubi ille acquireva alique del linguas ci.

Compellite a fortiate labor de sclavo in Auschwitz durante le Secunde Guerra Mundial, Francis Markstein e su fidantiata, Ora (nascite in Rakospalota, Hungaria, in 1924), miraculosemente superviveva le guerra. Dece dies post le retorno de illa del campos de sclavos, le copula esseva maritate a un ceremonia, e - malgrado que Ora esseva gravide - illes abandonava Hungaria in 1946. Per un transporto illegal, organisate per le Agentia Judee, illes esseva portate a un campo de refugiatos in Germania, ubi nasceva lor filio unic, Igor. In le campo, illes obteneva le cognoscentia de un orphano de 16 annos, John Hirsch, cuje amicitate 30 annos plus tarde apportarea le Marksteins a Hamilton in Canada.

Post un anno in le campo de refugiatos, le familia viagiava a Francia pro cercar labor. Le atmosphera totevia esseva inhospitabile, e illes retornava a Hungaria que ora esseva sub regime communista.

In 1949 - un anno post le establimento del stato - illes emigrava a Israel ubi durante vinti annos Francis Markstein  inseniava le hebreo e le anglese como maestro. Illes viveva in plure locos ante finalmente seliger Holon. Igor Markstein studiava musica, e Ora Markstein trovava un sculptor hungare qui la apprendeva le arte.

Lor filio cambiava in le initio del 1970s domicilio a Illinois in le SUA pro studiar. Durante un visita in 1974 a Montreal in Canada, le copula prendeva un decision spontanee. Francis Markstein applicava como studente matur al Universitate Sir George Williams (ora Concordia).

Depost 1974 Francis e Ora Markstein - "sculptor talentose", como ille la describeva mesme - viveva in Canada, lor patria de selection, in Hamilton. Ci Francis Markstein finiva su studios universitari e laborava qua traductor. Un polyglotto, ille faceva cognoscentia de Interlingua in le etate de 70 annos e tosto comenciava traducer in illo e scriber reflexiones philosophic. Alicun obras sue appareva in le magazines de interlingua Currero, Heraldo de Interlingua, e Panorama.

"Io lege in italiano, espaniol e russo, e mi predilection es studiar e traducer ab linguas diverse, principalmente textos litterari e poetic," ille mesme ha explicate.

Ille publicava quatro libros: un comedietta in hebreo, un traduction de sonettos italian per Milton in anglese (le version anque in interlingua esseva preste in manuscripto); un collection de satiresc versiculos bilingual (italiano e anglese), un altere trilingual (latin-anglese e romançal, le proba de un lingua artificial create per Francis Markstein mesme).

In 1990, ille esseva proxime a acceptar le carga de devenir representante de interlingua in Canada, ma ille con multe regret debeva abandonar le posto offerite a causa del perdition del vista in le oculo sinistre.

In le ultime tempore Francis Markstein laborava super le traduction del Libro del Prophetas Minor ex le Biblia, ma le morte inexpectate le ha impedite in finir lo; dece del dece-duo textos esseva alora traducite. Ille habeva hemoragia cerebral e esseva cinque dies sin conscientia ante de morir, 77 annos de etate.

Ille lassava post se su sposa, Aurelia Ora Markstein (anque de nascentia hungare) e lor filio unic, musicante, qui vive in le SUA.

Ligamines:
"Le libertate de crear" (in anglese), un interview con Ora Markstein ab februario 2008 in Hamilton Jewish News.

Actualisate: 2012-04-29

Redaction: Th. Breinstrup, Ingvar Stenström e Jesper Olsson
Copyright © 2001-2012 Union Mundial pro Interlingua