Hans Neerbek

Danmark
Nascite: le 6 de novembre 1917
Morite: le 25 de augusto 2010

Le motor danese. Altere notiones non coperi assatis ben le labor de Hans Neerbek pro interlingua.

Hans Neerbek nasceva in 1917 in Copenhagen. Ille deveniva studente in 1936 ab le Gymnasio de Frederiksberg e, in 1947, cand. mag. in historia e anglese. Tosto ille anque habeva un ample interesse pro interlingua. Como empleato desde 1948, lector desde 1962 e finalmente, desde 1973, lector de studios al Gymnasio Østersøgade – plus tarde, in 1965, appellate le Gymnasio Kildegård – ille establiva le prime ver inseniamento de interlingua in Danmark in le initio del 1960s, ubi su maniera spumante e energic faceva interlingua un disciplina popular. Numerose de su alumnos hodie possede postos importante in le vita public e diplomatia. Assi p.ex. le danese ex-ministro pro le ambiente, Svend Auken, e le advocato general de Danmark al Tribunal del Union Europee, Michael Elsberg, ha apprendite interlingua.

Anque le Union Danese pro Interlingua (DIU) es le obra de Hans Neerbek. Illo esseva fundate in 1960 - le 7 de novembre, al die post le anniversario de Hans Neerbek mesme. Le initiator del DIU deveniva su prime vice-presidente (ille certo vole participar ma non como le capite - ille prefere esser le persona qui tira in le cordes), un posto que ille manteneva usque 1975, ubi ille lo abandonava pro dar spatio a fortias plus juvene.  Desde alora ille ha essite multo active in le coulisse como le "ideario" del union danese. Sempre plen de initiativas surprendente que pone interlingua sur le agenda - sovente a causa de lor genialitate surprendente. Ille anque esseva le motor al collection del historia de DIU, que duceva a "Ud med sproget!" per Thomas Breinstrup in 1991. Illo es ricamente illustrate e contine ample capitulos super le historia original e international del lingua.

Con su sposa, Lith  (qui del resto anque nasceva le 6 de novembre como Hans Neerbek, ma in 1918), ille ha essite hospite de arrangiamentos durante le annos recente al "Die de Interlingua", le 15 de januario.

Extra interlingua, ille succedeva trovar tempore pro discursos e scriber libros super themas historic e militar-historic. Hans Neerbek esseva membro del Commission Militar-Historic sub le ministerio danese de defensa. In 1972, ille publicava "Det stockholmske blodbad" (Gad, 1972). "Søstrenes Slot - Hvidøres historie gennem tiderne" appareva al casa editorial Hernov in 1990, e in 1996 le casa editorial del Universitate de Odense publicava su libro "Ridder uden kors" super le oncle del autrice Karen Blixen – ambes naturalmente con un summario in interlingua. Le libro le plus recente, "Kuli" super Tihon Kulikovsky, le granfilio del tsar russe, ha un texto in interlingua, e le planificate version anglese de illo continera un summario in interlingua. E inter multe altere cosas ille traduceva "Happy Birthday" in interlingua como "Bon fortuna a te!" que ha essite cantate a omne occasiones possibile. Ille anque ha scribite un curso de parolas estranier in danese que utilisa interlingua como fundamento pro le inseniamento, e sub le pseudonymo Esbern Hak ille ha publicate un collection de novellas original, "Paletta", in interlingua.

Hans Neerbek moriva le 25 de augusto 2010, 92 annos de etate. Le morte esseva subito, como ille mesme desirava. Malgrado problemas con le sanitate, ille continuava scriber e assi lassava post se le manuscripto a cinque libros historic.

Revidite: 2010-09-07

Redaction: Th. Breinstrup, Ingvar Stenström e Jesper Olsson
Copyright © 2001-2010 Union Mundial pro Interlingua