 |
||||||||||||||||||||||||||||||||||||||||||||||||||||||||||||||||||||||||||
 |
||||||||||||||||||||||||||||||||||||||||||||||||||||||||||||||||||||||||||
 |
||||||||||||||||||||||||||||||||||||||||||||||||||||||||||||||||||||||||||
|
||||||||||||||||||||||||||||||||||||||||||||||||||||||||||||||||||||||||||
|
|
 Barbara RubinsteinSvedia Pro le prime vice in le historia del Union Mundial pro Interlingua, un femina esseva in le autumno 2001 appunctate su presidente. In unanimitate le consilio general del UMI approbava appunctar Barbara Rubinstein, alora 47 annos e de Svedia, como nove presidente del UMI. Illa substitueva un altere svedese, Jesper Olsson, e deveniva le solmente quarte presidente del UMI desde le fundation del organisation in 1955. Barbara Rubinstein es doctor de odontologia, promovite in Göteborg, Svedia, ubi illa habita. Su dissertation se appellava “Tinnitus e molestias craniomandibular – esque il ha un connexion?” Illa ha inseniate al Facultate de Odontologia del Universitate de Göteborg e labora ora como epidemiologo in le provincia Västra Götaland. Barbara Rubinstein esseva le organisator in chef del 15-te Conferentia International de Interlingua in Gdansk, Polonia, durante le estate 2001, ubi illa faceva un admirabile labor como motor del conferentia. Illa monstrava su capacitate de vincer omne obstaculos que se trovava super le cammino. Durante un reunion del consilio general del UMI in Gdansk, le consilieros unanimemente proponeva Barbara Rubinstein como candidato multo apte pro le posto de presidente del UMI. Un recommendation que tote le consilio ora ha approbate. Barbara Rubinstein ha durante multe annos essite active in le Societate Svedese pro Interlingua, ubi illa es le informator. Su attitude active ha resultate que illa sempre face un labor promotional pro interlingua durante viages professional e private. Barbara Rubinstein, qui nasceva in Varsovia como le plus juvene de tres infantes, es maritate con Anatol Rawicz, qui es programmista e de origine ukrainian. Illes habita desde 1970 in Göteborg al costa occidental de Svedia e ha tres infantes, qui omnes es active in interlingua. Le plus grande, Michael, assi es le designator detra le sito professional del Societate Svedese pro Interlingua in Internet, www.interlingua.nu. Le interesse lingual del patre de Barbara Rubinstein ha continuate a illa, qui parla polonese, svedese, francese, russo, anglese, un poco de germano e alora interlingua, que illa discoperiva per hasardo in 1994. Desde 1997 illa ha participate in omne conferentias international de interlingua. Le presidente del UMI desde 1999, Jesper Olsson declarava ja in le initio de 2001 que ille desirava retirar se del posto. Su studios linguistic durante le tempore a venir non le permitterea dedicar le tempore que ille trovava necessari pro le UMI. Ille assi prefereva transferer le presidentia a un persona con plus de possibilitates pro poner le fortias e labor necessari in le posto. Jesper Olsson continuava como vice-presidente del Societate Svedese pro Interlingua e esseva durante le 15-te Conferentia International de Interlingua in Gdansk in 2001 appunctate anque consiliero del Fundation Bakonyi pro Lingua Universal. Revidite: 2006-12-29 |
|
|||||||||||||||||||||||||||||||||||||||||||||||||||||||||||||||||||||||
|
||||||||||||||||||||||||||||||||||||||||||||||||||||||||||||||||||||||||||
| |
||||||||||||||||||||||||||||||||||||||||||||||||||||||||||||||||||||||||||
Redaction:
Th. Breinstrup, Ingvar Stenström e Jesper Olsson |
||||||||||||||||||||||||||||||||||||||||||||||||||||||||||||||||||||||||||
