Ingvar Stenström

Svedia
Nascite: le 19 de maio 1928

Illo esseva guardate melio que le optime secreto statal de Svedia, quando Ingvar Stenström in 1988 habeva 60 annos. Le data esseva impossibile a revelar, e le alora nove Panorama solmente in novembre poteva mentionar le facto in breve.

Ingvar Stenström – per amicos sempre appellate "Interlingvar" – ha durante multissime annos essite Senior Interlingua. Ille parla le lingua quasi melio que su lingua materne svedese e ha essite le dynamo detra le transferimento de interlingua e su organisationes ab esser clubs de hobby al situation hodie con organisationes professional e active. Ille anque ha professionalisate le diffusion de interlingua, primo per introducer le lingua in 1967 in le alora nove disciplina gymnasial "general cognoscentia lingual", per le qual le alumnos usava interlingua pro apprender svedese parolas estranier, secundo per le edition professional de su duo "bestsellers": le parve rubie "Interlingua – instrumento moderne de communication international" de 1972 e su "Interlingua-svensk ordbok" de 1995. Le prime esseva editate per le casa editorial le plus grande de materiales pro inseniamento, Läromedelsförlagen (Esselte), le secunde per le casa editorial del famose Universitate de Lund, Studentlitteratur. Ambes ha vendite eminentemente, e le parve rubie ha devenite un classico inter manuales de interlingua con commentarios national apparente in usque ora svedese, danese, norvegiano, francese, germano, finnese, romaniano, hungaro, russo e tosto mesmo serbo-croato; plure altere editiones sequera.

Ingvar Stenström nasceva in 1928 in Karlskoga in Värmland, le citate ubi se construe le cannones Bofors, ma anque le paisage del qual veni le majoritate del poetas svedese. Malgrado su proprie parolas, ille succedeva devenir un "grande cannon" in le mundo de interlingua. Post le gymnasio ille studiava anglese, germano, phonetica e francese al universitate de Lund e deveniva candidato philosophic in le primavera de 1955 e magistro philosophic (fil. mag.) in le autumno. Post un anno plus, ille esseva adjuncto in Sölvesborg, habeva un curso practic de professores al schola latin de Malmö, e desde 1962 esseva adjuncto al gymnasio in Varberg con inseniamento de anglese, germano e general cognoscentia lingual.

Su interesse pro interlingua nasceva, quando ille in 1952 comprava le "Interlingua-English Dictionary", habente apparite le anno in avante, e le "Interlingua Grammar". Su prime contacto con altere interlinguistas esseva in 1954, e ille participava in le prime conferentia international de interlingua in Tours, Francia, in 1955. Iste prime annos de interlingua, le interlinguistas ducente esseva in lor maniera originales. Ma poco a poco, le organisationes cambiava, assi que interlingua con illos non plus esseva considerate un curiositate eccentric ma plus tosto un instrumento moderne de communication international. Ingvar Stenström ha per su persistentia e dur labor contribuite remarcabilemente a iste developpamento verso conditiones "normalisate".

Ille prendeva in 1963 le initiativa al fundation del Societate Svedese pro Interlingua ab le 1 de januario 1964. Ille ha participate in omne conferentias desde illo in Tours, excepte un singule, e ille assecurava que le prime incontro scandinave de interlingua poteva occurrer in Lund in 1988. Le incontros ha devenite un tradition biennal, e desde le sexte in 1988 illos ha devenite nordic con participation finnese. Ingvar Stenström ha – post multe persuasion – comenciate scriber le historia del conferentias de interlingua, nam nemo pote como ille narrar le historia in un maniera capturante e fascinante, plen de memorias personal e anecdotas. Iste talento de narrar le participantes del conferentias e incontros de interlingua anque ha experientiate, quando Ingvar Stenström se sede in le sofa e comencia presentar su proprie traduction de alcun perla litterari. Mesmo le infantes es capturate per su magia talentose.

Al conferentias, su prime remarca al jentaculo es sempre "mal matino", nam Ingvar Stenström es un homine, qui labora le melio in le vesperes e mesmo noctes. A vices isto es necessari, proque ille non retrova le ver papiros. "Mi secretaria non face bon ordine," ille constata durante que ille cerca e cerca in le ordinator de papiros.

Ingvar Stenström se maritava in 1954 con Berit, qui anque es fil. mag. Illes ha duo pueros, Erik de 1956 e Henrik de 1959.

Redaction: Th. Breinstrup, Ingvar Stenström e Jesper Olsson
Copyright © 2001-2007 Union Mundial pro Interlingua