|
 |
Prime incontro historic
in urbe historic
Mini-portrait de Lund, le hospite del 1-me Incontro Scandinave de Interlingua
in 1988.
 Lund,
situate un poco al sud de Landskrona a 10 km del costa west-svedese, es un citate historic
con multe traditiones e un ric vita universitari. Lund assi hospita i.a. le urbe de
recercas IDEON. Lund esseva fundate in 1020 e es centralmente placiate in le sud de
Svedia. Le universitate de Lund esseva fundate in 1666.
Le Hotel universitari Sparta (Tunavägen 39 in Lund) deveniva le loco del prime
incontro scandinave de interlingua.
Le cathedral de Lund (al photo) esseva inaugurate in 1145 e es le edificio romanic le
plus elegante del paises nordic - un rememoration del archiepiscopato le plus ancian que
existeva in Danmark, Norvegia, Svedia e Finlandia. Le horologio astronomic in le ecclesia
se data del 14-te seculo. A 12 e 15 horas in dies de labor (e a 13 e 15 horas a dominicas)
duo cavalleros al summitate comencia schermir. Duo heraldos trompetta, durante que le
organo joca "In dulci jubilo". Alora un parve porta se aperi, e exi le sancte
tres reges. Quando illes es ante le Virgine Maria e le infante Jesus, illes genuflecte
ante de disparer per un porta in le latere derecte del horologio.
In le voltas del crypto le pilares es ricamente ornamentate. Duo de illos ha al
fundamento un figura - un de illos es dicite esser le gigante Finn, qui secundo le mytho
erigeva le ecclesia pro laudar le sancte Laurentio. Su pagamento debeva esser le Sol e le
Luna - o le oculos del homine sancte que Finn usarea como joculos pro su infante, si non
Laurentio divinava antea su nomine. Le vespere ante que le ultime petra debeva esser
placiate, sancte Laurentio ambulava un ultime tour, ante que le gigante debeva tirar su
oculos ex le facie. Ille veniva a un collina e audiva ab le profundo del collina un femina
cantar un canto de cuna pro su parve infante super su patre - le gigante Finn. Laurentio
habeva craccate le codice. In ira furiose le gigante iva al crypto del ecclesia, capturava
con ambe bracios le columna de supporto pro demolir le ecclesia, ma in le mesme momento
ille esseva petrificate. Assi occurreva anque pro su sposa e infante, qui teneva lor
bracios super un altere columna de supporto. |
|
|
|
|
|
| FACTOS |
|
|
|
