Prime Congresso International de Endocrinologia, Copenhagen, Danmark, 18-23 de julio 1960

1.500 participantes de 30-40 paises differente participava in le Prime Congresso International de Endocrinologia in Copenhagen, Danmark. Le Union Danese pro Interlingua esseva, in collaboration con Alexander Gode, responsabile pro traducer tote le materiales - le programma, formularios con inscription, reservation de hoteles, participation in arrangiamentos e un requesta de inviar summarios del presentationes e discursos - in interlingua.

Sub le nomine Interlingua Service, le quatro daneses Bjarner Svejgaard, Jørgen Kofod-Jensen, Poul Moth e Bent Andersen faceva un grande labor pro orientar le pressa e radio. Tote le primavera 1960 on laborava con le textos pro le congresso. 684 summarios debeva esser traducite, le majoritate esseva a 400-500 parolas cata uno. Poul Moth, Bjarner Svejgaard e Alexander Gode preparava le textos.

Quando le congresso aperiva, le daneses habeva arrangiate un exposition de litteratura e brochures super interlingua in le edificio del congresso. Le exposition esseva ben visitate per le participantes, del quales multes exprimeva contento con interlingua. Anque le signos in le edificio - "Vestiario", "scala", "auditorio" etc. - esseva presentate in interlingua.

Post le conferentia esseva publicate duo libros - le plus spisse de circa 900 paginas - con summarios del presentationes.

Ecce alcun exemplos del formularios official del congresso in interlingua (clicca sur le imagine pro vider lo plus grande):

Redaction: Th. Breinstrup, Ingvar Stenström e Jesper Olsson
Copyright © 2001-2016 Union Mundial pro Interlingua