Le utilitate de interlingua
in le scientia e le ingenieria

Per Forrest F. Cleveland
Departimento de Ingenieria Electric
Universitate de Kentucky, Lexinton, Kentucky 40506, S.U.A.

QUANDO UN scientista o ingeniero comencia un investigation de recerca o disveloppamento, le prime passo es a examinar le litteratura pro trovar qual ha essite facite previemente super iste thema. Infortunatemente, iste informationes es a esser trovate in multe jornales, frequentemente publicate in linguas que le investigator non pote leger. Il esserea un grande servicio a tal investigatores si le litteratura de scientia e ingenieria esserea publicate in un singule lingua que esserea legibile per le plus grande numero del scientistas e ingenieros del mundo.

Isto esseva le pensar del scriptor quando in februario 1952 un de su studentes postgraduate (Fred L. Voelz) monstrava ille un specimen de un inter-lingua appellate "Interlingua". A lor surprisa, illes trovava que illes poteva leger iste nove lingua, in despecto del facto que illes non habeva audite de illo jammais o habeva studiate illo. Scribente pro plus informationes, illes trovava que Interlingua esseva basate super le characteristicas commun de ille linguas que ha crescite ex le latino (anglese, espaniol, francese, italiano, e portugese). Isto significarea que alicuno con un cognoscentia de un o plus de iste linguas moderne poterea leger Interlingua a un grande extento sin le necessitate del tempore e effortio requirite pro le apprender de un nove lingua.

Un Proba Experimental

CONVINCITE DEL sagessa del principios super le quales Interlingua esseva fundate, le scriptor, post multe discussiones con su studente, decideva que le uso de Interlingua facilitarea grandemente le communication inter scientistas e ingenieros. Pro probar iste conclusion, il esseva decidite a comenciar un micre jornal mensual in le campo special de recerca del scriptor (spectroscopia molecular). Le jornal esseva a esser appellate "Spectroscopia Molecular", e esseva a esser producite e distribuite si incostosemente como possibile si que le precio de subscription esserea convenibile pro le plus grande numero del spectroscopistas del mundo. Illo continerea material que esserea de interesse e valor al spectroscopistas. Illo esserea publicate entiremente in Interlingua e esserea scribite, dactylographate, e distribuite per le scriptor, sed omne le costos de impression e distribution esserea pagate per subscriptiones de illos qui beneficiarea per le existentia del periodico. Le costos non esserea permittite jammais a exceder le amonta del receptas financiari. Articulos convenibile pro publication esserea acceptate pro adder al interesse e valor del jornal.

Le Prime Annos

VOLUMINE 1, NUMERO 1, del nove jornal micre esseva publicate al prime die de maio 1952, cinque septimanas ante le Annue Symposio super le Structura Molecular e le Spectroscopia al Universitate Statal de Ohio in Columbus. Le scriptor partiva pro iste assemblea con alicun trepidation. Esserea le reaction del spectroscopistas ridicule o approbation? A su relevamento le reaction esseva approbation. Multe interesse esseva exprimite in iste projecto experimental. Subscriptiones comenciava a arrivar e le productores de instrumentos spectroscopic comenciava a inviar annuncios pro attachamento al jornal. Quando le reserva financiari deveniva sufficiente, le editiones mimeographate esseva reimplaciate per editiones Xeroxate. Plus tarde un mast-capite blau esseva addite, e post illo un dactylographo IBM Selectric esseva obtenite. Le apparentia gradualmente meliorate e un fundo de reserva sufficiente a garantir le publication pro un anno in avantia esseva accumulate. Fundos extra iste amonto esseva usate pro le melioration del jornal.

Al principio, le manuscripto del scriptor in Interlingua esseva legite e corrigite per Dr. Alexander Gode al Division de Interlingua de Science Service in New York, sed tosto le numero de correctiones deveniva si micre que il pareva justificabile a continuar sin iste servicio, assi conservante le fundos de correction pro altere meliorationes.

Subscriptiones ex scientistas, ingenieros, bibliothecas, e laboratorios universitari, industrial, e governamental continuava a accrescer usque in decembre 1973 il habeva subscriptores in 27 nationes. Istos, listate in le ordine del numero de subscriptores, esseva: Statos Unite de America; India; Russia; Anglaterra; Canada; Belgica e Francia; Danmark e Germania; Espania, Hollanda, Sveda, Switza, e Yugoslavia; e Argentina, Australia, China, Finlandia, Hungaria, Israel, Italia, Kazakh S.S.R., Lebanon, Norvega, Polonia, Venezuela, e Wales.

Ab le principio, le scriptor ha insistite super le plus alte standardes de excellentia que es possibile pro le micre jornal. Alicun evidentia de successo in iste reguardo es indicate per le natura del lista de subscription. Le categorias, date in le ordine del numero de subscriptores, es: Spectroscopistas individual, bibliotecas de recerca governamental, laboratorios industrial de recerca e disveloppamento, academias de scientia, institutos de recerca, companias instrumental, Laureates Nobel, Library of Congress, Chemical Abstracts Service (le qual regularmante prepara summarios de articulos in le jornal), Scholarly Publication Center, National Lending Library for Science and Technology (Anglaterra), National Science Library of Canada, National Academy of Science (S.U.A.), National Bureau of Standards (S.U.A.), University Microfilms (le qual produce copias de microfilm de numeros passate), e National Library of Peking. Il non es probabile que tal subscriptores renovarea lor subscriptiones anno post anno, como illes face, si le jornal non habeva attingite alicun grado de excellentia o utilitate.

Contentos

IN GENERAL, le jornal contine informationes e novas de interesse e valor al spectroscopistas del mundo.

Usualmente, le prime pagina de cata numero contine un Gemma de Sagessa trovate per le scriptor in su leger. Isto es usualmente non-spectroscopic. Etiam, super le prime pagina, appare un conto breve del cosa le plus interessante que ha occurrite durante le mense. In altere paginas, il ha revistas de nove libros, e un calendario (revidite mensualmente) de assembleas spectroscopic. Le paginas que remane contine breve summarios de nove discopertas o disveloppamentos, novas de spectroscopistas, novas de nove instrumentos e technicas, reportos de assembleas spectroscopic, e altere novas de interesse e valor. Occasionalmente, il ha un articulo de recerca que habeva essite submittite pro publication.

Le numero de decembre etiam contine indices. Il ha un indice de nomines, indice de formulas chimic, indice de libros revidite durante le anno, indice del adresses del publicatores de iste libros, e un indice de materias.

Conclusion

ISTE EXPERIMENTO nunc ha essite in progresso pro 22 annos. Durante iste intervallo, 22 volumines, 260 mensualmente numeros consecutive, 1650 paginas, e 950.000 parolas de Interlingua ha essite publicate in le jornal. Ex iste experientia, il es clar que Interlingua es un lingua convenibile pro communicationes inter le spectroscopistas del mundo.

Le experimento continuara, etiam si nunc illo es plus un continuation de un micre jornal que ha provate su utilitate, que un proba del convenibilitate de Interlingua, proque Interlingua etiam ha provate su utilitate pro communication global.

Redaction: Th. Breinstrup, Ingvar Stenström e Jesper Olsson
Copyright © 2001-2007 Union Mundial pro Interlingua