Børge R. Christensen

Danmark
Nascite: (non cognite)
Morite: (non cognite) maio 1989

Børge Rosgaard Christensen comenciava su studio al Instituto Polytechnic ma lo interrumpeva pro devenir inseniator. Post alcun annos in le schola primari ille in 1971 deveniva cand. scient. in mathematica e physica e esseva empleate al Seminario Statal de Tønder in Jutlandia del sud, ubi ille plus tarde esseva lector de studios.

Børge R. Christensen esseva le genio detra le lingua computatorial COMAL (Common Algorithmic Language) que esseva designate pro uso in le scholas ma que in vice es in uso in le industria pro programmar le robots, per exemplo. COMAL, developpate 1972-1978, esseva in multe manieras typic pro le modo de laborar de Børge R. Christensen: illo esseva de facto un lingua computatorial, ma isto non debeva impedir que illo esseva construite vermente logicamente, assi que omnes habeva un chance pro facilemente usar lo. Technica computatorial debeva secundo su opinion non esser un mundo claudite pro expertos. Isto ille monstrava i.a. in su manuales multo inspirante de COMAL.

In le 1980s Børge R. Christensen fundava "Institut for Teoretisk og Anvendt Informatik" (Instituto pro Informatica Theoretic e Applicate) in locales del seminario que ille amava. Si il esseva fin de septimana o non, significava nihil, quando ille comenciava su labor. Malgrado isto ille habeva sempre tempore pro ir a visita o mesme reciper visitas de alumnos ancian qui appreciava multo su cordialitate. Con le clausura del seminario ITAI justo habeva obtenite nove locales un poco extra Tønder, e Børge R. Christensen gaudeva a cambiar domicilio. Ille habeva grande projectos in su planos ante le apertura del mercato interne del Communitate Europee. Su ingagiamento e grande sapientia le forniva de numerose contactos international in le mundo computatorial.

Durante plus que 20 annos ille succedeva trovar tempore pro occupar se con le international lingua auxiliar interlingua. In martio 1989 ille deveniva consiliero del Union Danese pro Interlingua, ubi ille habeva expectate poter facer ancora plus pro le lingua, i.a. per elaborar un version in interlingua de COMAL, Inter-COMAL.

Børge R. Christensen moriva in maio 1989, 58 annos de etate.

Revidite: 2006-12-29

Redaction: Th. Breinstrup, Ingvar Stenström e Jesper Olsson
Copyright © 2001-2007 Union Mundial pro Interlingua