Interlingua 2001: Lingua computatorial usa interlingua

Cognite lingua computatorial
in version de interlingua

Un version in interlingua del successose lingua computatorial COMAL esseva sub developpamento, ma le morte del autor stoppava le projecto, InterCOMAL.

Per Thomas Breinstrup

"Es mi conviction que interlingua es un lingua ideal pro implementar un version international de COMAL."

InterCOMAL

Vide le exemplos de programmation (mesmo amusante) in Interlingua-COMAL o InterCOMAL in practica. Clicca al illustration

Assi diceva le danese inventor del multo usate lingua computatorial de programmation, Børge R. Christensen, a Panorama in 1989. Ille habeva comenciate elaborar un tal version international de su systema, a appellar se Inter-COMAL (Interlingua-COMAL).

COMAL (un acronymo del parolas anglese COMmun Algorithmic Lingua) es le plus usate lingua de programmation in Danmark e es multo usate in Svedia, Germania West, Hollanda e le Statos Unite. COMAL esseva developpate in le annos 1973-1976 al Seminario Statal de Tønder, in Jutlandia Sud, Danmark. A ille tempore le computatores esseva como commodas enorme. Usque al 1950s solmente esseva possibile dar al machinas commandos per medio de codices de cifras, ma alora datalogos de IBM developpava un methodo que faceva possibile scriber programmas in un lingua que esseva multo plus proxime al human maniera de pensar que le codices. Le lingua se appellava Fortran, e un de su successores esseva Basic. Basic totevia solmente esseva apte pro programmas de poc lineas; esseva difficile trovar e corriger errores, e le alumnos sovente abandonava "le stupide machina" in un stato de profunde frustration.

Lector Benedict Løfstedt e Børge R. Christensen in le primavera de 1973 comenciava studiar le theorias de facer un nove lingua computatorial, multo plus clar e precise. In Basic un programma pote parer como in basso. Al comprar un certe merce on obtene un disconto de 5%, si le precio de factura es plus de 100 coronas. Le merce es vendite separatemente, e le precio es pro un merce 3 coronas. (Vide le exemplo a dextere.)

Le grande avantage de COMAL es que on lo comprende e non besonia esser un experto ante de poter usar lo in programmation. Le grande labor de scriber le codices assi que le computator los comprendeva esseva poco a poco finite gratias al discipulo Per Christiansen qui habeva grande interesse pro le labor e esseva un maestro a scriber codices rapidemente. In augusto 1974 le computator interpretava e exequeva le prime programma de COMAL, e in januario 1975 le prime versiones esseva inviate a altere seminarios, alcun scholas e gymnasios. Libros e manuales esseva preparate, e le uso se diffundeva. In 1978 Børge R. Christensen comenciava preparar un nove version, titulate COMAL-80, proque illo esseva expectate esser preste in 1980. Illo esseva programmate per le discipulo Arne Christensen. COMAL-80 capturava interesse international. Assi solmente in le Statos Unite il ha plus de 200.000 usatores, e un special version UniCOMAL se usa in le industria pro direction de robots.

Børge R. Christensen in augusto 1988 comenciava laborar con un version in interlingua de su successose systema. Le definitiones del parolas clave esseva traducite in interlingua con le adjuta de Thomas Breinstrup del Union Danese pro Interlingua, e varie tests demonstrava que InterCOMAL functionava sin problemas.

Børge R. Christensen regrettabilemente moriva in maio 1989 sin haber finite su projecto.

Revidite: 2006-12-29

FACTOS

Le codice es ci demonstrate in Basic (le prime cifras es le numero del linea):

10 LET P=3
20 INPUT A
30 LET S=P*A
40 IF S>100 THEN GOTO 70
50 PRINT "Precio de factura": ",S
60 GOTO 80
70 PRINT "Precio de factura": ",S*0,95
80 END

Ma in COMAL on non vide le codices ma un linguage plus clar:

10 precio per pecia:=3
20 INPUT numero
30 precio de vendita:=precio per pecia*numero
40 SI precio de vendita>100 ALORA
50 PREMER "precio de factura: ",precio de vendita*0,95
60 SINON
70 PREMER "precio de factura: ",precio de vendita
80 FINSI

InterCOMAL in practica (con exemplos)

Cognite lingua computatorial in version de interlingua

Cognite lingua computatorial
in version de interlingua