Erik Enfors

Svedia
Nascite: 19 de martio 1938

Erik Enfors nasceva in Vänerborg in 1938 e deveniva studente del mesme urbe in 1957. In 1964 ille finiva su education in Stockholm como veterinario.

Desde su tempore gymnasial, Erik Enfors non ha studiate linguas. Ille laborava como veterinario, primarimente con grande animales como vaccas, cavallos e porcos, in Halmstad e Nyköping e desde 1982 in Varberg, ubi ille habita. Desde 1999 ille esseva pensionate a causa de un infarcto cardiac que faceva su labor sempre plus impossibile.

Erik Enfors comenciava studiar interlingua in 1999. Ille participava a un curso sub Ingvar Stenström, le secretario del Societate Svedese pro Interlingua. Isto occurreva post que ille discoperiva le sito in Internet del Union Mundial pro Interlingua, www.interlingua.com. Isto le faceva pensar al experientias positive de su filia, quando illa studiava cognoscentia linguistic general in le gymnasio - sub Ingvar Stenström. Erik Enfors discoperiva que su cognoscentia de terminos medical in latino esseva un bon adjuta in le studios de interlingua. Su patre studiava un poco de esperanto, ma Erik Enfors mesme non apprendeva multo e lo ha oblidate.

Ille participava in le estate 2000 in su prime incontro de interlingua, a saper le 7-me Incontro Nordic de Interlingua in Åsa, al nord de Varberg. Ci ille contribueva multo activemente. Pro isto il esseva natural demandar le, si ille voleva devenir nove redactor in chef del magazin nordic Actualitates, quando le redactor desde 1972, Jørgen Kofod-Jensen, debeva retirar se post un cadita que le impediva laborar, como ille voleva. Le prime edition de Actualitates sub le redactorato de Erik Enfors esseva januario-martio 2001.

Erik Enfors ha un grande hobby: philatelia. E su medico le consilia jocar golf sovente, lo que place a ille.

Redaction: Th. Breinstrup, Ingvar Stenström e Jesper Olsson
Copyright © 2001-2007 Union Mundial pro Interlingua