|
|
 |
Ronald V. Spathaky durante le conferentia de interlingua
in Basel, 1971
Ronald V. Spathaky
Grande Britannia
Nascite: le 22 de novembre 1914
Morite: le 13 januario 2013
Un del grande motores pro interlingua in Grande Britannia
e in le resto del mundo ha essite Ronald V. Spathaky.
Ronald (Ron) Victor Spathaky nasceva le 22 de novembre
1914 in Cardiff, Galles. Su matre Clara esseva pianista professional
qui sonava pro films mute, su patre Albert esseva director de un
cinema. 11 annos de etate Ron e su familia quitava Cardiff e habitava
in differente locos (Gower Peninsula, High Wycombe, Cromer e
Sheffield). Quando le parentes iva a Warrington, Ron Spathaky remaneva
in le casa de un amico pro poter continuar in Nether Edge Grammar
School. Durante le vacantias estive ille bicyclava de Warrington a
Paris in Francia e retro e assi esseva capturate per le francese.
"Post studios in un schola ordinari secundari de Sheffield io obteneva
un entrata libere al Universitate de Sheffield, ubi io studiava durante
tres annos litteraturas francese e anglese. Post illo io completava un
anno de studios pedagogic pro devenir inseniante. Omnes in nostre
facultate de humanitates esseva marxista, e io deveniva marxista con le
alteres. Io es multo differente al presente," ille narrava in 2004 in
un interview con Thomas Breinstrup.
Su prime posto como professor esseva in Brighton, ubi ille se ingagiava
in activitates local del ala sinistre e incontrava ci Kathleen Cree,
hodie 94 annos. Quando illa habeva solmente 18 annos, le copula se
maritava, e le 21 de decembre 2012 illes assi celebrava 75 annos de
maritage. Le ceremonia de maritage in 1937 esseva tenite in secreto in
un pausa de lunch, proque Kath – duo dies ante haber 19 annos – non
esserea permittite completar su studios de pharmacia al collegio, si on
lo sapeva. Pro isto il habeva nulle photos del maritage, e nulle
membros del familia esseva presente.
Quando demandate del secreto de lor longe vita felice e maritate, Ron
Spathaky respondeva al pressa: "Marita vos juvene."
Ronald Spathaky continuava su empleo de inseniar francese al schola
local, e Kath finiva su studios e comenciava como apprentisse in le
apotheca Boots in Brighton. Le collegio discoperiva finalmente su
maritage e la prohibeva assister in le lectiones, ma illa poteva
prender su examines e deveniva pharmacista in 1940. Ronald Spathaky
inseniava francese in le Corpore de Education del Armea durante le
Secunde Guerra Mundial e assisteva le paracaditistas in le 8ve Armea
preparar pro operationes in Francia. Ille serviva in Normandia, in
Africa del Nord de Marocco a Egypto e in Palestina e finiva le guerra
como capitano.
Le familia habitava in Smethwick vicin a Birmingham de
1946 a 1950, in Portadown in Irlanda del Nord de 1950 a 1956, e
retornava in 1956 a Anglaterra al region
East Anglia. Ron Spathaky inseniava in plure scholas, i.a.
Portadown College (1950-1956), e deveniva in 1956 le chef de linguas in
le nove Thorpe
Grammar School extra Norwich. Post 20 annos ille retirava in 1976 como
vice-inspector scholar.
Durante su carga como professor ille anque participava in le debatto
del societate, in sports del schola, in le production del magazin del
schola e mesmo introduceva classes de dansar.
Ille anque laborava pro le movimento ambiental e capturava le interesse
pro interlingua. Su prime contacto esseva quando ille durante le
comenciamento del Secunde Guerra Mundial comprava le libro per
Frederick Bodmer, "The Loom of Language" (Le telario del linguage) e
tosto postea ille "legeva con gaudio le obra monumental de Alexander
Gode, le "Dictionario Interlingua-Anglese", que esseva un petra
fundamental pro le movimento".
"Tosto eveniva le zenit de mi carriera como interlinguista," explicava
Ron Spathaky in le interview e narrava como Alexander Gode non sempre
esseva contente con su articulos in le magazines de interlingua, ubi
ille describeva i.a. ideas del historico britannic, Arnold Toynbee.
Ja in le annos 1950 ille participava con André
Schild (Suissa) in le labor de Russell F. Trimble (SUA) de elaborar
un nomenclatura de compositos chimic in interlingua. 1955-1960 ille
esseva le diligente redactor general e litterari de Currero, le magazin official
del Union Mundial pro Interlingua (UMI), que in 1957 cambiava nomine a
Bulletin de Interlingua. In 1956 ille esseva cofundator e – durante un
tempore – mesmo presidente del Societate
Britannic pro Interlingua e coautor del "Dictionario
Anglese-Interlingua", ubi ille preparava le littera F.
In 1971, ille participava in le 4te Conferentia International de
Interlingua in Basel, Suissa, e esseva le arrangiator principal del 5te
conferentia in Norwich 1973, que reestabliva le tradition de
conferentias de interlingua.
In 1975, Peter Berwick, Brian
C. Sexton e Ronald Spathaky - omnes del Societate Britannic pro
Interlingua - comenciava compilar un nove dictionario
anglese-interlingua, usante circa 10.000 parolas seligite per Spathaky.
Plus tarde, post le completion del prime edition, Spathaky resignava, e
Frank Esterhill (SUA) prendeva su
placia. Le resultato del dictionario, sub redaction de F.P. Gopsill, appareva como "Concise
English-Interlingua Dictionary" in 1987.
Post su retirata como professor de francese e germano,
ille comenciava laborar voluntari pro le Universitate de Cambridge del
tertie etate. Su materia es le paranormal. Ille habita in Cambridge con
su sposa Kath.
Ronald Spathaky esseva le coproprietario de un yacht, su
orgolio de gaudio, con su filio.
"Io stoppava mi labores perque io comenciava pensar que
malgrado nostre effortios un altere lingua assumeva le rolo del lingua
international, le lingua anglese. Il es possibile que io faceva un
error in ille momento, il non es certe que le anglese essera le victor,
ma le apparentias indica isto in le anno 2004. Io admira extrememente
le perseverantia del enthusiastas. Io spera que vostre effortios non
essera un guasto de tempore," diceva Ron Spathaky.
In 2012 le copula Spathaky cambiava domicilio a un appartamento in un
casa de cura in le village Burwell, Cambridgeshire. Le cecitate de
Ronald Spathaky non le impediva continuar un vita active e plen de
eventos.
Ille moriva pacificamente in januario 2013, 98 annos de etate, in
Burwell.
Kath e Ron Spathaky ha tres infantes (John Michael, Jean e David
Victor), septe graninfantes e octo grangraninfantes. Ron Spathaky
donava su corpore a recercas medical e assi non esseva sepelite, ma il
habeva le 2 de februario un servicio memorial pro ille.
Ronald V. Spathaky con Kathleen al maritage de lor filia Jean le 26 de maio 2012.
Ligamine al pagina del familia Spathaky, "Our Spathaky Ancestry":
www.spathaky.name/ancestry/spathaky.htm
Revidite:
2013-03-19
|
|
|
