Eugen Wüster

Austria
3 de octobre 1898 - 29 de martio 1977

Eugen Wüster es cognoscite como le fundator del terminologia como disciplina independente scientific, e su "Introduction al terminologia general e lexicographia terminographic ("Einführung in die allgemeine Terminologielehre und terminographische Lexikographie") es le classico del litteratura moderne terminologic.

Eugen Wüster nasceva in Wieselburg, Niederösterreich, como filio de un patre qui possedeva un fabrica. Post le schola popular ille visitava post un anno le sanatorio scholar "Friderizianum" in Davos e pois le gymnasio in Hirschberg (Silesia) e deveniva studente in 1918. Ille entrava in le Technische Hochschule (Schola Superior Technic) in Berlin, ubi ille supplementava le studios per practica al Siemens-Schuckert-Werken. In decembre 1927 ille obteneva "multo bon" al examine pro diploma in currente de alte tension e electrotechnica.

De su patre Eugen Wüster hereditava in Wieselburg le firma Wüster & Co., un fabrica de utensiles e laminatorios de aciero. Durante le sequente duo annos ille laborava anque pro devenir doctor de technica - un titulo que ille recipeva del Schola Superior Technic in Stuttgart con le character "Auszeichnung" (Excellentia). Ille anque deveniva consiliero commercial. Le titulo professor de universitate ille acquireva per su labores pro terminologia in ISO 37 (le Organisation de Standardisation International). Ille esseva presidente del commission pro terminologia e lexicographia del Association International de Linguistica Applicate e professor de lexicologia e terminologia in le universitate de Vienna.

Eugen Wüster es mundialmente famose como le creator del theoria de terminologias e fundator del ISO. Ja in 1923 le juvene studente comenciava publicar vocabularios in esperanto con le intention que esperanto devenirea le fundamento del terminologia international del technica. In le etate de 15 annos, Eugen Wüster apprendeva cognoscer esperanto, ma pois que ille habeva nulle persona con qui conversar, ille parlava con se mesme e assi apprendeva le lingua vermente ben - quasi si ben como su lingua materne. Su labor minutiose e ben organisate con le Dictionario Encyclopedic de Esperanto comenciava in 1918; le volumines partial appareva 1923, 1925, 1926 e 1929.

In 1931 appareva su libro de epocha super le terminologia in Berlin. Illo anque esseva traducite in russo. Per su continue labores con le normas terminologic ille se habeva facite si famose, que in 1947 professor André Martinet, le director del labor linguistic-scientific de IALA, arrivava a Vienna pro discuter varie problemas del normas con ille. In 1955, Eugen Wüster esseva ordinate pro docente de machinas e utensiles pro labor con ligno al Schola Superior pro Agricultura in Vienna. In 1958, in occasion de su 60-esime anniversario, appare in le magazin "Sprachforum" (Forum Lingual) un comprehensive mention de su prestationes. Leo Weisgerber, le ducente germanista german, le laudeva per un articulo que portava le titulo "Ein Markstein angewandter Sprachwissenschaft - Begegnung mit Eugen Wüster" (Un culmine del linguistica applicate - incontro con Eugen Wüster).

In 1963, Eugen Wüster recipeva le "Moneta Laude Auree" del austriac Association de Ingenieros e Architectos in Vienna, e in 1966 appareva le secunde edition de su famose libro con le supplemento "35 annos plus tarde", in le qual Eugen Wüster parla de su experientias e sapientias del thema.

Post interventiones del firma Hoerbiger & Co. in Vienna, representate per Engelbert Pigal, representante de interlingua in Austria usque a su morte in 1978, in le curso del decennios le base lingual per Eugen Wüster era transponite al systema Occidental e al fin totalmente in interlingua, basate sur le "Interlingua-English Dictionary" (1951) sub redaction final de Alexander Gode-von Aesch.

Ab 1935 Eugen Wüster esseva delegato pro Austria in le Commission Electrotechnic International, e ille esseva le coordinator pro le terminos german in le grande plurilingual "Vocabulario Electrotechnic International". Ille anque editava un vocabulario de machinas utensile, un vocabulario trilingual in duo volumines. Su obra le plus cognite totevia es "Internationale Sprachnormung in der Technik, besonders in der Elektrotechnik" (Normalisation international del lingua del technica, specialmente in le electrotechnica), del qual le prime edition appareva in 1931 e le tertie in 1970.

Eugen Wüster maestrava ben interlingua e contribueva al redaction del secunde edition del "Interlingua Grammar" in 1971.

Eugen Wüster habeva un perseverantia non-deviante, un enorme diligentia e fidelitate al idea interne e assi demonstrava que ille esseva un del plus grande interlinguistas de omne epochas. Ille sacrificava cata die multe horas a su firma e al interlinguistica, ma "regrettabilemente ille dedicava pauc tempore a su movimento physic," como scribeva su amico, Engelbert Pigal (morite in 1978), in le necrologia in Currero julio-septembre 1977.

Ille moriva 79 annos de etate.

Revidite: 2006-12-29

Redaction: Th. Breinstrup, Ingvar Stenström e Jesper Olsson
Copyright © 2001-2007 Union Mundial pro Interlingua