Ab le prime conferentia ukrainian, ab sinistre: Vasilij Šurkov, Volodymyr Khominets, Aleksandr Masterov, Aleksandr Tkachenko, (sedente) Tania Tkachenko, Olga Vedernikova, Victor Sitnichenko, Sergej Yamkovoj, Alesya Nivkalo. Photo: Jurij Cherednikov

Vista optimista in Ukraina

Le optimismo esseva grande, quando le Prime Conferentia de Interlingua habeva loco in Odessa in augusto 1996. Iste reporto appareva in Panorama.

Per Jurij Cherednikov

UKRAINA
    Le interlinguistas ukrainian se ha assemblate pro le Prime Conferentia de Interlingua in le belle citate de porto Odessa (1.300.000 habitantes), le 29-30 de augusto 1996.

Un bon impulso pro le decision de arrangiar le conferentia national esseva date per le 12-e Conferentia International in Praga, occurrite le anno passate e visitate per un grande gruppo de supportatores de interlingua ex Ukraina.

Le incontro interlinguista ha habite loco in le Instituto de Recercas Scientific de Machinas-Utensiles e Instrumentos, situate justo in le centro del urbe maritime. Le convenibile position del loco del Conferentia possibilisava vider le belle vistas del parte historic de Odessa, visitar plure museos, sentir le ambiente international del porto quando varie linguas es circum audite per numerose touristas.

Le foro ukrainian esseva aperite per le inspirator del Conferentia Victor Sitnichenko, vice-presidente del Societate Ukrainian pro Interlingua. Gratias a su effortios arrangiatori le participantes sentiva nulle problema con le hotel, loco del labor e mangiar, excursion in le centro del citate.

Pavor de parlar dispareva

Le Conferentia Ukrainian esseva presentate per le participantes del tres citates ukrainian: Berdiansk, Niejyn e Odessa. Infelicemente, le veniente reforma monetari, declarate officialmente per le governamento de Ukraina, impediva venir a plure usatores de interlingua ab altere urbes de Ukraina e per isto diminueva le scopo del geographia, coperite per le participantes del conferentia.

Totevia, le valorose experientia es augmentate, le pavor de usar interlingua incorrectemente dispare poco a poco e cede loco al securitate lingual, le ideas de como facer interlingua cognoscite per multes se multiplica. Pro isto le 13 participantes del conferentia non es tanto mal pro le comencio, nonne? Le plus importante, il sembla, es ideas, decisiones, surprisas e actiones a sequer. E alicun surprisas durante le incontro esseva a vices admirabile...

Assi, le sempre modeste redactor del jornal in/re interlingua "Fenestra in le futuro" Volodymyr Khominets e su amico e co-redactor Vasilij Šurkov, quasi al fin del Conferentia, modestemente sortiva del portafolio un manuscripto del quasi preste dictionario ukrainiano-interlingua (10.000 parolas)! Le reaction del personas presente esseva como un choc. Le creatores del dictionario lo annunciava a nulle persona! Le labor del correction final va prender 2-3 menses, postea le dictionario essera transcribite e preparate pro le typographia professional. Que dicer: plus de tal personas modeste al movimento de interlingua!

Societate ukrainian un realitate - con proprie jornal

Le conferentia ha prendite le decision de attribuer le statuto del organo official del Societate Ukrainian pro Interlingua al jornal "Fenestra in le futuro". Ab ora iste trimensual va esser create per le effortios commun plus intensive e organisate del latere del representantes del societate national.

Quanto al societate ipse, illo va appellar se non "Union Ukrainian pro Interlingua", sed, como il es stipulate in le statutos del organisation, "Societate Ukrainian pro Interlingua" (SUI). Discutente le forma optimal del cooperation del varie brancas del societate, le conferentia decideva appunctar le representantes regional in cata region de Ukraina. Le representantes official del SUI in Niejyn e Berdiansk esseva respectivemente eligite: Volodymyr Khominets e Alexandr Tkachenko. Plus tarde essera nominate le representantes in altere regiones de Ukraina.

Jurij Cherednikov e Victor Sitnichenko, prime presidente e vice-presidentedel Societate Ukrainian pro Interlingua, photographiate in Odessa, le 30 de augusto 1996. Photo: Aleksandr Tkachenko

Le active interlinguista berdiansquese Alexander Tkachenko informava le participantes del conferentia super le littera optimista, recipite ab le Ministro del Education de Ukraina quanto al introduction de interlingua in scholas e gymnasios de Ukraina in le futuro. Le idea ipse placeva al ministro, sed il es necessari, sin dubitas, le tempore pro realisar lo.

Le active consiliero ukrainian in le Consilio General del UMI Anatolij Gupalo, qui infelicemente non ha potite venir al Conferentia, creava le projecto del Centro de Education, appellate "Polyglotto". Secundo le idea del gruppo del enthusiastas ab Berdiansk, le centros essera formate in Kiev e Berdiansk pro le studio del linguas estranier e interlingua per le methodo del "tertium comparationis". Le idea, si realisate, poterea contribuer multo al popularisation de interlingua in Ukraina.

Salutes e pensatas ab tote le mundo

Le Prime Conferentia Ukrainian esseva calidemente supportate per multe organisationes de interlingua e personas ab varie paises del mundo. Le facsimile e Internet laborava fructuosemente pro transmitter le felicitationes al participantes del Prime Conferentia Ukrainian ab tote le mundo. Le spirito del ver festa regeva in le sala conferential quando on legeva le messages con gratulationes. Gratias le plus calide a vos, nostre collegas estranier! Sin vostre supporto, le sol non esserea si brillante dum le dies del Conferentia!

Le juvene etate del majoritate del participantes del Conferentia ha devenite un particularitate special, e isto certo vole dicer que le movimento interlinguista in Ukraina es juvene a omne respectos e, in ultra, que le vista ab le "Fenestra in le futuro" de interlingua in Ukraina es vermente optimista. A revider nos a sequente incontros national e international que va occurrer cata anno!

Redaction: Th. Breinstrup, Ingvar Stenström e Jesper Olsson
Copyright © 2001-2015 Union Mundial pro Interlingua