Messages mystic
e salutes al majestate
Le international Die de Interlingua non solmente ha sequite
le vias traditional pro diffunder informationes super le lingua. Le
originalitate ha essite quasi sin limite.
Per Thomas Breinstrup
Le activitates al annual Die de Interlingua le 15 de januario ha
essite multo (multo!) diverse durante le annos. Le originalitate ha
essite quasi sin limite e comprehende messages mystic a ambassadas a
salutes al majestate. Le idea del Die de Interlingua es fixar un
data, ubi activitates - minor o major - in tote le mundo pote esser
facite al mesme tempore in forma coordinate e assi marcar vermente le
nomine interlingua in le mente public.
Le activitates plus traditional ha desde le prime Die de
Interlingua in 1992 comprehendite discursos public, expostiones in
bibliothecas public de libros de e in interlingua, il ha habite
"stands" (parve expositiones equipate con personas) in
bibliothecas, on ha arrangiate postmeridies public, ubi on poteva
venir e parlar in e super interlingua, etc.
In 1997, le Die de Interlingua coincideva con le 25-nte
anniversario como regente del regina danese, Margrethe II. Que esseva
plus natural que usar le occasion pro salutar la? Dunque al die mesme
esseva inviate al corte danese in le castello regal Amalienborg iste
littera:
Felicitationes
Nos qui usa le die hodie - le 15 de januario - pro celebrar le international "Die de Interlingua" invia a Su Majestate Regina Margrethe le optime felicitationes in occasion del 25-nte jubileo de regente.
Le Die de Interlingua esseva introducite in 1992 e es celebrate in cinque continentes pro crear attention al international lingua axiliar, interlingua. le obra standard, "Interlingua-English Dictionary", appareva le 15 de
januario 1951 como le prime in interlingua.
Bon fortuna e felicitationes!
(sign.)
Le corte inviava un belle responsa como gratias.
Le messages mystic
In 1995, le Union Danese pro Interlingua utilisava le facto que le
die esseva un dominica, e quasi omne botecas e institutiones ha
claudite - anque le ambassadas.
Durante le arrangiamento in Copenhagen, on telephonava a omne
ambassadas romanophone representate in le capital danese. Sapente que
illos esseva claudite, on in vice esseva salutate per un secretario
automatic, le machina telephonic, e como sempre on pote - post le
message - mesme parlar. Isto on faceva. In omne casos, esseva
registrate un message (in interlingua) al secretario automatic:
"Nota, per favor! Il es ora possibile pro firmas espaniol /
italian / portugese / venezuelan /... corresponder directemente con
firmas danese per interlingua, le medio de communication
international. Informationes ulterior: Tres, un, dece, dece, duo,
dece, novem. Gratias!"
Plus tarde in le postmeridie esseva inviate a omne iste ambassadas
un littera (in interlingua), signate per le presidente del
Union Danese pro Interlingua, Jørgen
Kofod-Jensen. Isto arrivava - multo strategicamente - le die
sequente, lunedi, quando le personal certo stupefacite de ascoltar un
message in un lingua incognite que illes comprendeva a prime vista. In
le littera, Jørgen Kofod-Jensen i.a. scribeva:
"In occasion del Die de interlingua le 15 de januario,
instituite per le Union Mundial pro Interlingua, le organisationes
national de interlingua sur cinque continentes actiona pro attraher
le attention public al instrumento moderne de communication
international: le international lingua auxiliar interlingua.
Nos spera per iste littera scribite in interlingua informar anque
vos super le multe possibilitates practic de un lingua international
neutral e facile."
Le littera anque presentava factos de interlingua e de como
interlingua functiona quotidianmente. E con le littera sequeva varie
materiales informative.
Diploma a juvene artista
Le juvene artista, Jakob Waage, deveniva subito mundialmente famose
in Danmark, quando le Union Danese pro Interlingua in 1998 decideva
dar le un diploma e un parve summa de supporto pro su labor con le
banda designate super le agente Jaco.
Jakob Waage qui debutava (in interlingua) in le parve quaderno
"PLUS" super Teddy le Urso con su excitante banda designate
super le aventuras de Jaco. Le initiativa debeva capturar le interesse
del juvenes, e pro isto Jakob Waage recipeva un stipendio de 500
coronas danese - quasi como in su banda designate. Illo fini per que
le heroe recipe "le Tintin auree" pro su manuscripto - in
interlingua.
Un communication al pressa esseva expedite in le vespere, e durante
le veniente dies Jakob Waage, 18 annos, deveniva un nomine cognoscite
in tote Danmark. Mesmo in le nord del peninsula Jutlandia, le pressa
telephonava pro saper plus.
In le communication al pressa esseva explicate que Jakob Waage
usava alcun menses pro scriber e designar le aventuras de Jaco.
"Le plus difficile esseva facer lo esser intra le quadros del
picturas. Mi cosino Anders originalmente habeva le idea al historia.
Io mesme esseva inspirate per le banda designate svedese, Felix, qui
de facto ha nulle personalitate. Io me imaginava que anque non mi
figuras debeva haber lo in le initio ma obtener lo poco a poco per le
personas que illes incontra," explicava Jakob Waage.
Ille non voleva revelar a que ille usarea le stipendio. Ma le Union
Danese pro Interlingua habeva promittite poner a disposition le papiro
necessari, si ille voleva continuar designar plus de episodios super
Jaco.
Revidite: 2006-12-29
|
