Interlingua 2001: Agente in e pro interlingua

Agente in e pro interlingua

Bandas designate non es numerose in interlingua, ma le agente Jaco totevia ha create un certe interesse public. E su juvene "patre" ha recipite un legato pro su labor.

Per Thomas Breinstrup

Admittite - bandas designate non es abundante in interlingua.

Ma le banda designate super le agente Jaco totevia ha capturate le interesse del pressa, quando Jakob Waage, alora 18 annos, al Die de Interlingua le 15 de januario 1998 recipeva un legato de 500 coronas danese pro su début como artista de bandas designate - e in interlingua.

Premio pro Jakob Waage, 1998. Photo: Thomas Breinstrup

Jørgen Kofod-Jensen (a sinistre) dona como presidente del Dansk Interlingua Union le premio pro originalitate a Jakob Waage (a dextere), durante que Lith Neerbek (in le centro) specta. Le photo es del Die de Interlingua, le 15 de januario 1998. Photo: Thomas Breinstrup

Le banda de Jakob Waage tracta del agente Jaco qui post un aventura phantastic recipe "le Tintin auree" pro su manuscripto - in interlingua. Jakob Waage ha mesme e scribite e designate le serie, que es parte del parve quaderno "PLUS" super le Natal e vespere del Anno Nove de Teddy le Urso, scribite per Esbern Hak. Le presidente del Union Danese pro Interlingua, Jørgen Kofod-Jensen, donava le legato al juvene designator talentose a un arrangiamento in le casa del presidente in Farum al nord de Copenhagen.

Jakob Waage usava alcun menses pro scriber e designar le aventuras de Jaco.

"Le plus difficile esseva manear le historia a in le quadros del picturas. Mi cosino Anders originalmente habeva le idea al historia. Io mesme esseva inspirate per le banda designate svedese Felix, que de facto ha nulle personalitate. Io me imaginava que anque non mi figuras debeva haber lo in le initio ma poteva obtener lo poco a poco per le personas que illes incontra," explicava Jakob Waage in Actualitates de januario-martio 1998.

Su proprie favorites inter bandas designate comprehende le danese Valhalla super le ancian deos nordic, le superheroes e bandas designate "subterren". Quando ille non produce bandas designate, Jakob Waage pinge aquarellos e paisages. Ille anque lege litteratura de science-fiction o textos super "le Guerra del Stellas".

Le Aventuras de Jaco. Designos: Jakob Waage

Le prime medie pagina del aventuras de Jaco como publicate in 1996. Designos: Jakob Waage

Senior Interlingua, bon die!

SR. INTERLINGUA

Bandas designate es ancora un maniera de interessar specialmente un publico juvene in interlingua.

Isto anque esseva le ration, quando un altere "stella" de interlingua, Senior Interlingua, appareva in 1981 sur un folio de reclamo pro interlingua. Senior Interlingua - symbolisate per un grande I con capite e un grande surriso - debeva attraher un altere gruppo de interessatos a interlingua, a saper le juvene generation que es importante pro un qualcunque organisation. Senior Interlingua esseva usate pro alcun folios informative del Union Danese pro Interlingua.

Le figura pois appareva numerose vices in le magazin Heraldo de Interlingua, editate in 1981 a 1987 per su "patre", Thomas Breinstrup ab Danmark. Le breve bandas designate habeva como scopo explicar interlingua in interlingua e assi capturar le interesse del lectores.

FACTOS

Le agente Jaco habeva su début in le publication
Esbern Hak & Jakob Waage: "PLUS con Teddy le urso e su amicos e le aventuras de Jaco", 24 pp. A5, Servicio de Libros, 1996. ISBN 90-71196-43-7.

Senior Interlingua non - ancora - ha habite su proprie publicationes ma ha monstrate su facie surridente in plure connexiones.