|
 |
Un revolution
in le mundo scientific
Le début scientific de interlingua es un historia de successo. Un magazin
specialisate succedeva esser publicate integremente in interlingua durante 27 annos,
proque illo plenava un lacuna importante in le scientia.
Per Thomas Breinstrup
Un magazin scientific scribite totalmente in interlingua.
Isto esseva pro multes un belle sonio, ma pro dr. Forrest F. Cleveland - professor de physica al
Instituto Illinois de Technologia - le resultato deveniva "Spectroscopia Molecular'',
cuje prime edition (volumine 1, no. 1) appareva le 1 de maio 1952. Le magazin publicava
durante 27˝ annos informationes e novas de interesse pro spectroscopistas in tote le
mundo - qualcosa que illes omnes besoniava ma non poteva trovar in altere magazines.
Le idea veniva a Forrest F. Cleveland, quando un studente graduate, dr. Fred L. Voelz,
in februario le mesme anno monstrava a Forrest F. Cleveland un magazin scientific con un
specimen de texto in interlingua.
"Impressionate per le facilitate per le qual illo poteva esser legite, e per le
senso san per le qual illo habeva essite producite, io decideva comenciar le edition in
iste lingua de un parve periodico mensual, que esserea de interesse e valor pro
scientistas qui recerca in mi proprie dominio special, spectroscopia molecular,'' Forrest
F. Cleveland scribeva in un articulo "Spanning Language Barriers'' in le magazin
"Research/Development''.
Ab anxietate a applauso
Le prime edition appareva cinque septimanas ante le annual Symposio de Structura e
Spectroscopia Molecular al Universitate del Stato Ohio, durante sex dies. Cleveland
partiva pro le symposio, multo anxie del reception de su periodico. Esserea le reactiones
derision o applauso. Illo esseva applauso, le interesse esseva grande, multes deveniva
abonatos, e fabricantes de instrumentos professional insereva annuncios in le magazin. Con
un melior economia le magazin esseva ameliorate, le apparentia graphic deveniva melior, e
on establiva un fundation de reserva pro assecurar le edition del magazin un anno a in le
futuro.
Spectroscopia Molecular publicava novas, summarios de litteratura, reportos ab
incontros spectroscopic, recensiones, calendario de eventos spectroscopic, nove
instrumentos e novas de spectroscopistas. In 1961 le lista de abonatos comprehendeva
spectroscopistas individual, bibliothecas universitari, laboratorios e bibliothecas
governamental de recercas, firmas de instrumentos, laureatos de Nobel, le Bibliotheca del
Congresso, Chemical Abstracts Service, Scholarly Publication Center, National Lending
Library for Science and Technology in Grande Britannia, National Science Library of
Canada, U.S.A. National Academy of Sciences, U.S.A. National Bureau of Standards,
University Microfilms e le Bibliotheca National de Beijing, China. In total, Spectroscopia
Molecular esseva inviate a 29 lande, malgrado le thema specialisate, p.ex. a India,
Russia, Danmark, Yugoslavia, Argentina, Australia, China, Libano e Venezuela.
Pocos del lectores ha studiate le lingua
Cleveland se meraviliava del reception del magazin:
"Le experientia con iste parve periodico da provas persuadente pro le utilitate de
interlingua a intercommunication. Illo ha supportate se ipse per abonamentos e annuncios.
Pocos, si mesmo ulles, del lectores ha usate tempore pro studiar le lingua. De facto io
dubita si multes de illes del toto ha comprate le dictionario e le grammatica. Ma illes
esseva capace de leger le lingua con 80% de completamento le prime vice que illes lo
videva, e pro pensar le signification de parolas incognoscite ab le contexto, durante que
illes usava le lingua pro haber ideas e informationes de valor pro illes. Probabilemente
un scientista occupate non trovara jammais le tempore pro apprender un nove lingua, ma si
ille pote apprender lo, durante que ille lo usa, ille lo facera, como le experientia con
Spectroscopia Molecular demonstra.''
Spectroscopia Molecular appareva durante 27 annos. Quasi un million de parolas in
interlingua in plus que 1.650 paginas esseva imprimite.
In augusto 1977, le direction del american Interlingua Institute in un resolution
exprimeva "e gratitude e felicitationes a professor Forrest F. Cleveland qui ha
completate vinti-cinque annos de publication mensual ininterrumpite de Spectroscopia
Molecular."
Revidite: 2006-12-29 |
|
|
