Waldson Pinheiro

Brasil
Nascite: 3 de decembre 1930 - 6 de januario 1999

Waldson J.B. Pinheiro, membro del consilio general del Union Mundial pro Interlingua desde le fin de 1991, esseva appellate "le Gode brasilian", referente al ultime director de recercas del "International Auxiliary Language Association", dr. Alexander Gode, qui presideva le publication de interlingua in 1951.

Ille nasceva le 3 de decembre 1930 a a Caruarú, un citate famose pro su feria le sabbatos, in le stato de Pernambuco, al nord-est de Brasil.

Desde le lyceo, ille habeva interessate se pro linguas. Novem annos con studios de humanitates e philosophia in collegios jesuita le apportava al linguas ancian - latino, greco e hebreo. Ille cognosceva esperanto in 1945, quando ille habeva 15 annos, e ja in 1953 ille prendeva cognoscentia de interlingua per un publication del Science Service.

In 1972 ille obteneva le grado de magistro in education in le Houston University, SUA. Esseva durante su curso ci que ille legeva le "Interlingua Grammar", perfectionante se in interlingua.

Affiliate al Partito Socialista Brasilian, ille esseva duo vices candidato a burgomaestro de Natal, capital del stato de Rio Grande do Norte, su domicilio desde 1968. In 1988, ille se retirava de su functiones docente e administrative in le Universitate Federal local. Su activitates remaneva in le campos litterari, linguistic e civic.

Waldson Pinheiro esseva M.Ed., professor pensionate del Universitate Federal de Rio Grande do Norte, a Natal, le capital del stato del mesme nomine, in Brasil, ubi ille esseva instructor de linguas ancian e moderne.

Ille esseva collaborator decisive pro le fundation del Union Brasilian pro Interlingua in 1990. Pro interlingua ille traduceva le "Supplemento pro Lusophonos" del manual de Ingvar Stenström (1992), le romance brasilian "Vitas Aride" per Graciliano Ramos e finiva su "Dicionário Complementar Interlíngua-Português" con 6.500 parolas e un "Dicionário Português-Interlíngua" de 4.500 parolas, editate per le Universitate de Passo Fundo (1993). In ultra, ille traduceva poemas e litteras musical e es autor de decenas de articulos ultra un extense correspondentia con interlinguistas europee, nord- e sudamerican. Ille anque esseva le autor del manual "Interlíngua, a solução natural".

Su ingagiamento enorme in interlingua le dava le supernomine "le Gode brasilian", un recognoscentia de su multe labores e grande cognoscentia de interlingua.

Waldson Pinheiro esseva al puncto de arrangiar le 9-ne Conferentia Brasilian pro Interlingua in su urbe, Natal, quando ille le 6 de januario moriva a causa de un attacco cardiac, 69 annos de etate. Le conferentia in vice esseva establite in Vila Velha.

Redaction: Th. Breinstrup, Ingvar Stenström e Jesper Olsson
Copyright © 2001-2007 Union Mundial pro Interlingua