 |
||||||||||||||||||||||||||||||||||||||||||||||||||||||||||||||||||||||||||||
 |
||||||||||||||||||||||||||||||||||||||||||||||||||||||||||||||||||||||||||||
|
||||||||||||||||||||||||||||||||||||||||||||||||||||||||||||||||||||||||||||
|
||||||||||||||||||||||||||||||||||||||||||||||||||||||||||||||||||||||||||||
|
|
 Activitates
danese inspirava
|
||||||||||||||||||||||||||||||||||||||||||||||||||||||||||||||||||||||||||
SSI |
Svenska Sällskapet för Interlingua esseva fundate le 1 de
januario 1964 como le secunde organisation nordic de interlingua. |
Grande campania de information duceva al fundation del Societate Svedese pro Interlingua in 1964.
Per Thomas Breinstrup
In Svedia, le activitates in Danmark e le fundation in 1960 del Union Danese pro Interlingua (DIU) dava inspiration. Le linguas danese e svedese (e norvegiano) es si proxime le unes al alteres que on se comprende immediatemente, e traditionalmente le tres paises scandinave ha sempre habite bon relationes - anque in circulos de interlingua.
Ja in le tarde estate de 1963 ducente interlinguistas svedese requestava, si le magazin Actualitates poterea devenir magazin commun pro le membros de ambe paises, e si on poteva publicar lo plus frequentemente e con plus de paginas. Isto totevia esseva refusate del parte del DIU, que non judicava haber fortias pro - ultra le activitates de information - poner plus de labor in le magazin.
Alora appareva le pensata de facer un association svedese pro interlingua, Svenska Interlingua-Sällskapet. In augusto 1963 un littera de information - un circular - esseva inviate a un vintena de personas, cuje adresses Ingvar Stenström habeva colligite. Iste gruppo includeva ancian usatores del lingua auxiliar occidental como Erik Berggren, varie usatores del lingua artificial ido e le quatro o cinque personas, qui a ille tempore esseva membros del Union Mundial pro Interlingua.
Contacto a 2.000 professores
Le initiator del fundation del Societate Svedese pro Interlingua (o in svedese: Svenska Sällskapet för Interlingua, assi que le abbreviation remaneva le mesme) esseva Ingvar Stenström in collaboration con dr. med. dent. Richard Zimmermann e superingeniero John Nordin.
"Ante isto, Nordin, Zimmermann e io habeva facite un campania a 2.000 professores e docentes al universitates in Svedia. Nos divideva inter nos le adresses e los scribeva sur inveloppes, que Zimmermann postea distribueva con folio informative del IALA (International Auxiliary Language Association) e - si io non mismemora - un missiva de Nordin. Inter illes, Nordin postea trovava plure membros. In un fragmento, con 22 nomines, de un de nostre prime listas de membros, io videva que novem habeva le titulo "doctor", med. o phil.," narra Ingvar Stenström.
John Nordin deveniva immediatemente le gerente del departimento scientific del SSI. Ja le 1 de januario 1964 le Societate Svedese pro Interlingua comenciava su labor con John Nordin como prime presidente e Richard Zimmermann como prime secretario e administrator. Como un presente al association fraterne Actualitates, que intertanto habeva habite le danese H.P. Frodelund como redactor, promitteva poner columnas a disposition pro le collaboratores del nove organisation svedese.
(Un parte de iste texto es del libro "Ud med sproget!" per Thomas Breinstrup super le historia del Union Danese pro Interlingua)
Revidite: 2006-12-29
Redaction:
Th. Breinstrup, Ingvar Stenström e Jesper Olsson
Copyright © 2001-2007 Union Mundial pro
Interlingua