Le pioneros imprimeva
materiales in casa
Le technica de producer libros e materiales in interlingua durante
le prime decennios differe multo del computatores personal de nostre
tempore. Un pionero narra.
Per Thomas Breinstrup
Durante le prime decennios, le usatores e activistas de interlingua
faceva un grande labor pro persuader casas editorial professional a
publicar brochures e libros in interlingua.
Ma pois que le impression a ille tempore - multe annos ante le
popularisation del computator - esseva multo costose, formas
alternative debeva esser trovate pro publicar material in interlingua.
Ci veni le mimeographo e le hectographo. E que es alora iste
machinas? Brian C. Sexton,
secretario del Societate Britannic pro Interlingua, explica ci, como
isto esseva facite:
"Brevemente, le mimeographo (in Grande Britannia un stencil
duplicator) esseva inventate circa 1881 per David Gestetner, e
functionava per un stencil. Trans le incisiones del stencil penetrava
un tinta spisse, simile al tinta de imprimeria, que imprimeva sur le
papiro. Machinas quasi identic esseva manufacturate per le firmas
Roneo e Ellams. Inter le usatores famose de tal machinas esseva Ed
Blair, Dr. Gode, sr.
Goudkuil, e io. Io memora que quando io comprava un machina
Gestetner, le costo esseva £70. Un tal machina poteva imprimer plus
que 1.000 exemplares.
Quanto al hectographo (pro angleses un spirit duplicator),
io non sape quando illo esseva inventate. Le originales esseva typate
usante un papiro simile ma plus forte que papiro e carbon. Il habeva
nulle incisiones e nulle tinta. Le machina (manufactoratores typic
esseva Banda e Fordigraph) humectava un papiro con alcohol que
transfereva le characteres ab le original. Le resultatos esseva palide
blau/violette (como le tatu!) e le maxime numero de exemplares
legibile esseva 50-70. Le prime exemplares del magazin american
"International Language Review" esseva producite per un tal
machina. In Grande Britannia, omne publicationes de sr.
Hallowes (le prime secretario del Societate Britannic pro
Interlingua, D.M. Hallowes, red.) esseva producite assi,"
narra Brian C. Sexton.
Le "International Language Review" esseva redigite e
publicate per le americano Floyd Hardin, apparente omne tres menses
con plus que 80 paginas decata edition, continente articulos super un
varietate de linguas international. Le magazin appareva 1955-1966.
Revidite: 2006-12-29
|
